Kuvendi miratoi dje ndryshimet në Kodin Zgjedhor, që ndalojnë koalicionet parazgjedhore, edhe pse opozita e bashkuar nuk dha konsensusin e saj lidhur me një propozim të tillë të hedhur nga socialistët.
Duke anashkaluar Këshillin Politik, dhe me votat e deputetëve që vetëquhen si “opozita” parlamentare, Edi Rama arriti të realizojë projektin e tij, madje duke shfrytëzuar këtu propogandën për hapjen e listave të kandidatëve, edhe pse në variantin përfundimtar emrat do të caktohen nga Kryetari i partisë në renditje.
Në kushtet e faktit të kryer, partitë e opozitës duhet të përzgjedhin formulat se si do të përfaqësohen në zgjedhjet e 25 prillit.
Opsioni i një liste të vetme nuk është pranuar nga disa prej partive të opozitës, sikundër në takimin e zhvilluar pasditen e sotme me kreun demokrat, Lulzim Basha, është kundërshtuar edhe opsioni i aplikuar në 2017-ën, kur disa nga emrat e propozuar nga partitë aleate u përfshinë në listën e PD-së.
Burime nga opozita bëjnë të ditur se kryesisht kundërshtitë për skemën e 2017 janë bërë nga PAA e drejtuar nga Agron Duka dhe PR e Fatmir Mediut.
Mësohet se të dy aleatët e Bashës kanë kërkuar gjentjen e skemave të përfaqësimit, referuar peshës elektorale sipas qarqeve të çdo subjekti aleat.
Ndërkohë që duket se një nga opsionet është ai i përfaqësimit me dy koalicione, një i drejtuar nga PD dhe një tjetër nga LSI, e cila në anën e saj ka deklaruar se nuk ka ndërmend që në 25 prill të përfaqësohet pa siglën e saj.
Kjo do të thotë se opsioni i një liste unike të bjerë automatikisht.
Burime nga opozita bëjnë me dije se në shqyrtim do të jenë modele të aplikuara në vende të ndryshme, ndoshta ai mes CDU/CSU në Gjermani, por me dallimin që në qarqe të caktuara përfaqësimi me emrat e propozuar nga aleatët të jetë më i madh se në qarqet e tjera.
Gjithsesi çështjet teknike pritet të diskutohen nga ekspertët zgjedhorë të partive dhe për këtë mund të rivihet në funksion i njëjti grup pune që punoi mbi reformën zgjedhore që pasoi me ngritjen e Këshillit Politik.
