Kryeministri Edi Rama u shpreh gjatë seancës parlamentare se Presidenti Ilir Meta nuk ka as kapacitetin moral dhe as atë mendor që të përmbahet, edhe kur ka në krah të huaj.
“Meta përdor një fjalor vulgar dhe shantazhues, që unë se mbaj mend t’a ketë përdorur asnjë deri më tani”, tha Rama, gjatë seancës, duke reaguar ndaj bllokimit të foltores së Kuvendit nga deputetja Rudina Hajdari.
Kryeministri akuzoi Presidentin se po kontakton viktimat e OFL në skutat e vendit, por ta harroni ju dhe Ilir Meta, se ata mund të lëshojë çakejtë.
“Gjuha e Metës mund t’i shkojë me viktimat e OFL por jo me PS dhe deputetët. Me çfarë mjetesh ai shantazhon dhe kërcënon deputetët, apo me ata armët që do rrëmbeheshin në 2017”, tha Rama.
Ai tha se PS nuk është as shërbëtore e atyre që janë jashtë dhe as e atyre që janë brenda.
“Nuk i ve faj zonjës një fjalë, që përdor një fjalor jo të denjë për një nënë apo për një grua. Por asaj nuk i ve faj, kur shembullin më të keq na i jep Presidenti”, tha Rama.
Kryeministri tha se ju që jeni këtu nuk merrni vota as me listat e hapura, as të mbyllura.
“Listat janë të hapura, ne sot do të rrëzojmë kartelin e partive të të ashtëquajtur koalicione. Çdokush që do të marrë mandatin duhet të marrë vota, sepse me 100 apo 200 vota nuk ka më. PS nuk është shpk, as tren mallrash as “kap ça të kapësh”. Ne kemi të drejtën të rendisim në listë të gjithë skuadrën e vet, nga portieri te sulmuesi, madje edhe te rezervat”, tha Rama.
Sipas tij, partitë e vogla janë grupe interesi që kanë shqyer më shumë se PS apo PD plaçkën shtet.
“Janë pengmarrës që vijnë në Kuvend për të kapur një ministri dhe e kthejnë më pas në peng të atij që ka vulën”, tha Rama.
