Kryetari i Partisë Demokratike, Lulzim Basha risolli në vëmendje planin e PD-së për rimëkëmbjen ekonomike.
Lulzim Basha vizitoi sot disa biznese në kryeqytet tek “Rruga e Durrësit” dhe ajo “Myslym Shyri”. Basha tha se bizneset nuk bëjnë asnjë lek xhiro për ditë me radhë dhe se numri i atyre që po humbin vendin e punës po shtohet në mënyrë të përditshme.
“Bizneset po zhyten në një krizë që po thellohet. Qeveria e ka harruar dhe braktisur biznesin pa asnjë ndihmë”, shtoi ai.
Basha propozoi si zgjidhje paketën e PD-së
“E gjithë paketa jonë që parashikon: 1 mijë euro çek për çdo biznes të vogël. 200 mijë lek të vjetra pagesë për çdo njeri që rimerret në punë. 160 mijë lek të vjetra për çdo njeri që ka humbur punën 20 mijë lek të vjetra për çdo pensionist për gjashtë muaj me radhë, muaj për muaj”, sqaroi ai.
“Çeku 1 mijë euro për bizneset e vogla lehtëson krizën dhe i ndihmon për të mbajtur njerëzit në punë. 200 mijë lekë për bizneset qe rimarrin në punë të larguarit. Injektimi i këtyre parave në ekonomi rrit konsumin. Arsyeja pse Shqipëria është i vetmi vend në rajon që nuk ka një paketë të re ndihme është se Shqipëria ka një qeveri dhe një kryeministër që taksat i vjedh me një grusht oligarkësh. Vetëm me prokurorime publike, KLSH ka nxjerrë 300 milionë euro abuzime. Paketa jonë që jep ndihmë konkrete për biznesin, shëndetësinë dhe arsimin është 312 milionë euro. Shqipërisë i ka mundësitë të bëjë sa Maqedonia apo Kosova. Mjafton qe në 6 muajt e mbetur, Edi Rama të ndalë vjedhjen dhe shpërdorimin e taksave të shqiptarëve”, shtoi Basha.
