Është ekstraduar nga Greqia Aurela Doksani, e shpallur në kërkim ndërkomëbtar, pasi është dënuar nga Gjykata me 6 vite e 8 muaj burg, për trafikim të lëndëve narkotike.
Gjithashtu, u krye transferimi nga Italia drejt vendit tonë, i shqiptarit Paulin Nikaj, 40 vjeç, lindur në Gurëz, Krujë, i dënuar me 30 vite burg, për veprat penale “Vrasja”, “Mbajtja e paligjshme e armëve të zjarrit”, “Dëmtime personale” dhe “Falsifikimi i dokumenteve” në vitin 2017.
Doksani, në bashkëpunim me persona të tjerë, ka tentuar të trafikojë drejt Greqisë, në rrugë tokësore, lëndë narkotike të llojit heroinë. Në momentin e arrestimit, më datë 08.08.2011, i është gjetur dhe sekuestruar sasia prej 129.3 gramë lënde narkotike.
Më datë 12.08.2011, Gjykata ka vendosur ndaj saj masën e sigurisë “Arrest në shtëpi”. Në zbatim të vendimit të Gjykatës, Prokuroria pranë Gjykatës së Shkallës së Parë për Krimet e Rënda Tiranë, më datë 11.04.2012, ka nxjerrë urdhër për ekzekutimin e vendimit të mësipërm ndaj të dënuarës, për të vuajtur pjesën e dënimit të mbetur pas datës 09.04.2012 (1184 ditë burgim), në burg të sigurisë së zakonshme.
E dënuara nuk është gjetur në banesë dhe në këto kushte është shpallur në kërkim ndërkombëtar nga INTERPOL Tirana, sipas kërkesës së Prokurorisë për Krimet e Rënda.
Falë shkëmbimit të informacionit mes Interpol Tiranës dhe Interpol Athinës, më datë 28.04.2020 Aurela Doksani është arrestuar nga autoritetet policore në Greqi, me qellim ekstradimin drejt Shqipërisë.
Po nga Interpol Tirana u krye transferimi nga Italia drejt vendit tonë, i shqiptarit Paulin Nikaj, 40 vjeç, lindur në Gurëz, Krujë.
Paulin Nikaj, me vendimin penal të formës së prerë tl datës 01.02.2017 të Gjykatës së Krimeve të Rënda të Apelit, Bolonja/Itali, është dënuar përfundimisht me 30 vjet burgim, për veprat penale “Vrasja”, “Mbajtja e paligjshme e armëve të zjarrit”, “Dëmtime personale” dhe “Falsifikimi i dokumenteve”.
