Kryeministri Edi Rama ka reaguar në lidhje me denoncimet e fundit të Partisë Demokratike rreth familjeve të prekura nga tërmeti i nëntorit.
Duke marrë si shembull rastin e Fran dhe Bardhe Krosi nga fshati Bushnesh, kreu i qeverisë shkruan se bëhet fjalë për individë e familje që i vihen në dispozicion Partisë Demokratike për propagandë.
“Vazhdon avazi i ulët i mishit për top, me individë e familje që i vihen në dispozicion Partisë Demokratike për shfaqjet e propagandës së saj të shfrenuar kundër qeverisë, falë edhe mediave që nuk marrin mundimin më të vogël të verifikojnë vërtetësinë e këtyre shfaqjeve të shëmtuara… Njëra palë më dembele se tjetra”, shkruan Rama.
Duket se realiteti me të cilin përballen qytetarët e mbetur pa shtëpi nuk mund të kapërdihet nga Kryeministri, detyra e të cilit, bashkë me të zgjedhurit e tij vendorë, është t´u garantojë zgjidhje qytetarëve, që prej nëntorit të 2019 ndodhen në çadra ose janë rikthyer në banesat e dëmtuara.
Në fakt propogandën më të madhe lidhur me situatën e gjen në rradhët e Rilindjes, Kryeministrit, ministrit të Rindërtimit dhe Kryebashkiakut Erion Veliaj.
Rama e Veliaj shfaqen krah për krah edhe kur lyejnë një fasadë, ndërsa Ahmetaj nuk do të harrohet me lopatën në duar, gjoja duke bërë llaç, ndërsa këpucët i shkëlqenin.
