Supekupa e Gjermanisë/ Bayern Munich përballë Dortmundit synon trofeun e 5-të sezonal

Bayern Munich sfidon sot në mbrëmje, Borussian e Dortmundit në finalen e Superkupës së Gjermanisë. Ndeshja do të luhet në “Allianz Arena” në orën 20:30, një klasike kjo midis dy skuadrave më kompetitive në futbollin gjerman.

Në gusht të vitit të kaluar Dortmundi e mposhti Bayernin 2-0 në Superkupë dhe kampionët e Gjermanisë do të kërkojnë të hakmerren pikërisht për atë disfatë por në të njëjtën kohë do të kërkojnë të reagojnë pas asaj humbjeje të thellë në fundjavë për javën e dytë të Bundesligas ndaj Hoffenheim me shifrat 4-1.

Bayerni është i plotë përpara kësaj sfide ndërkohë që Dortmundi ka disa mungesa ku spikasin ato të Thorgan Hazard, Zagadou e Schmelzer.

Parashikohet një duel i zjarrtë dhe po aq spektakolar në “Allianz Arena” në praninë e disa mijë shikuesve. Bayern Munich kërkon në këtë sfidë trofeun e 5-të sezonal ndërsa Dortmundi kërkon ti japë disi fund dominimit të skuadrës së Flick duke i rrëmbyer këtë titull.