Rudina Hajdari kujton takimin e fundit me të atin/ “Dimë kush tërhoqi këmbëzën, por jo shkakun”

Rudina Hajdari, vajza e Azem Hajdarit, ka rrëfyer mbrëmjen e djeshme në emisionin “Opinion” takimin e fundit me babanë një orë para se ai të ekzekutohej.

“Ishim në një kafe, babi ishte shumë entuziast, po na përqafonte. Mamaja ishte 7 muajshe shtatzënë. Ishte një moment i ngrohtë dhe i bukur.

Në momentin që u ndamë, rreth orës 20-20.30, ai donte të shkonte në zyrë për të ndjekur lajmet. Në çast babi më mori ‘hopa’. Në momentin që u ndamë, ne po e prisnim në shtëpi, sepse do të vinte të hante darkë me ne. Pastaj ndodhi ngjarja, që ishte tronditëse për të gjithë Tiranën”, u shpreh Hajdari.

Por cila është porosia më e rëndësishme që Rudina kishte marrë nga babai?

“Ishte fakti që zgjohej në mëngjes, një rutinë që bënte çdo mëngjes, ku pinte kos ose qumësht, e merrte në dorë dhe dilte në oborr, ku e prisnin një varg njerëzish. Ai ulej aty dhe i priste, i takonte, të gjithë me radhë.

LEXO EDHE  Zjarri përfshin kodrat në gadishullin e Karaburunit

Unë isha fëmijë dhe më bënte përshtypje që njerëzit rrinin në radhë dhe ishin të duruar që ta takonin. Ajo që më bënte përshtypje ishte fakti që ai nuk lodhej kurrë.

Padyshim që ne e dimë gjithë ngjarjen dhe e dimë kush e tërhoqi atë këmbëzën. Edhe drejtësia e ka shpallur se kush kanë qenë ata persona, por nuk kuptohet pse këta persona e kanë bërë këtë gjë, kur Azem Hajdari ishte njeriu i shqiptarëve dhe është dashur prej të gjithëve” tha ajo.