Rasti i ngjashëm me Lleshajn/ Makina luksoze, ish-ministrja e Gruevskit dënohet me 4 vite burg

Ish-ministrja e Brendshme e Maqedonisë së Veriut, Gordana Jankullovska, është dënuar me 4 vite burg. Ajo është dërguar në burgun e Idrizovës në Shkup ku dhe do të vuaj dënimin.

Sipas mediave vendase, ajo akuzohet për blerjen e një makine luksoze nga Qeveria e Nikolla Gruevskit. Pas dënimit të saj ka reaguar VNRO-DPMNE-së, e cila thotë se ministrja është viktimë e padrejtësive dhe persekutimit politik të mafias së Zaevit.

“Gordana Jankulloska është viktimë e padrejtësive dhe persekutimit politik të mafias së Zaevit. Jankulloska shkon në burg për një makinë që e vozit dhe përdor Zoran Zaevi dhe mafia e tij, dhe në të njëjtën kohë kur e njëjta qeveri shpenzon mbi 8 milionë euro për të blerë automjete të reja zyrtare”, thuhet në komunikatën e VMRO-DPMNE-së.

Një rast i ngjashëm me Jankullovskën është denoncuar në Shqipëri, ku media dhe deputetë akuzojnë ministrin e Brendshëm, Sandër Lleshaj, se ka blerë një automjet luksoz, që shkon në mbi 100 mijë euro.

Vetë Lleshaj e ka mohuar shifrën e publikuar, edhe pse zyrtarisht makina që ai ka në përdorim, është luksoze.

Deputetë të opozitës parlamentare i kanë kërkuar shpjegime ministrit Lleshaj, nëse kjo Ministri kohët e fundit ka blerë një makinë tip BMW, me vlerë 100 mijë euro.

“Dhe unë po ju them me përgjegjësi të plotë që mjeti i blerë për llogari të Ministrisë së Brendshme nuk ka kushtuar 150.000 mijë euro, nuk ka kushtuar 100 milion por ka kushtuar vetëm 49.000 euro. Nëqoftëse ai mjet nuk ka kushtuar 49.000 euro unë jap dorëheqjen”, ka deklaruar Lleshaj.