Kreu demokrat Lulzim Basha tha sot se paratë që po u shpërndahen sot Klodian Mërtirit të inceneratorëve dhe oligarkëve të tjerë të lidhur me qeverinë, do të mjaftonin për të zgjidhur krizën ekonomike në vend.
Basha tha se po të ishte Kryeministër nuk do të lejonte që shkollat të mbeteshin pa ujë në kohën e pandemisë, ndërsa akuzoi Qeverinë se po “lan duart” me formularët që iu jep prindërve të nxënësve për t´i firmosur.
“Janë masa që duhej të ishin marrë dhe jo të pritej shtatori për të hapur shkollat pa asnjë masë, ndërkohë që janë shtuar rastet e infektimeve nga Covid-19.
Paratë që u jepen oligarkëve, Klodian Mërtirit të inceneratorëve, do të mjaftonin për të zgjidhur jo vetëm problemin e ujit në shkolla, por edhe për të ndihmuar familjet dhe bizneset e prekura nga pandemia.
Këta nuk morën asnjë masë konkrete që në fillimin e pandemisë dhe sot kur Europa po përballet me valën e dytë, Edi Rama vendos hapjen e ambienteve të brendshme të bareve dhe restoranteve pa asnjë masë, por duke ia lënë sërisht përgjegjësinë bizneseve”, tha Basha.
