Ish-Kryeministri Sali Berisha, duke iu referuar vrasjes së Azem Hajdarit më 12 shtator 1998 para selisë së vjetër të PD, tha se e kishte këshilluar ish-liderin e lëvizjes studentore lidhur me rrezikun që i kanosej.
“E kam këshilluar që të largohej 6 muaj, pasi ata ishin vrasës me uniformë të shtetit. Ne nuk kishim zgjedhur rrugën e luftës me ta”, tha Berisha.
I pyetur se kush e nxorri në pritë Azem Hajdarin, Berisha tha “e ka nxjerrë Fatos Klosi. Në zyrën time erdhi një person i tronditur, i cili më tha që unë e vrava. Ishte një militant i PD, i cili më tha që më morën në telefon dhe unë e njoftova Azemin. Në vendin e ngjarjes ishte një radio policie. Pse doli Azemi? Jam shumë dakort që ai ishte i kujdesshëm. Ai bëri një vlerësim të gabuar që doli, mund të mos dilte”.
“Nuk u fut në kurth nga askush brenda PD, thjesht pati një telefonatë mbi një makinë”, tha Berisha.
Duke sjellë në vëmendje mitingun e mbajtur në Tropojë disa muaj përpara vrasjes së Hajdarit, Berisha tha se kishte kërkuar që Fatmir Haklaj të sillej në Tiranë.
“Ishin bandë, shkuam në Tropojë për miting dhe na kishin bërë prita. I thashë të ecim përpara. Shkuam në Tropojë, ata qëllonin në ajër në atë zonën e tyre.
Unë i thashe kapeni dhe silleni në Tiranë atë që po prish rendin dhe qetësinë publike”, tha Berisha.
Në vijim, ai u shpreh se vrasësit e Hajdarit i zhduku shteti.
“Vetëm shteti mund të të vrasë me mina, në oborrin e shtëpisë. I zhduku shteti. Shteti ka shumë mundësi të bënte disa kombinime, po të mos donte shteti të zhdukeshin do të ishin të gjithë gjallë sot”, tha Berisha.
Ai tha se ka pasur marrëdhëniet më të shkëlqyera me Azem Hajdarin.
“Kishte luajalitet të përsosur në çdo kohë”, tha Berisha.
