Nga Boldnews.al
Drejtori i Shkollës së Magjistraturës, Arben Rakipi, një prej Ekspertëve të Lartë të Reformës në Drejtësi, ka vendosur të sfidojë hapur paketën kushtetuese e ligjore të miratuar duke filluar nga Korriku 2016 e në vijim.
Ai është në kushtet flagrante të konfliktit të interesave, pasi paralelisht me funksionin zyrtar, vijon të ushtrojë edhe profesionin e Avokatit.
Rakipi u emërua zyrtarisht Drejtor i Magjistraturës në 28 Korrik 2020, duke plotësuar vendin vakant të krijuar nga largimi i Sokol Sadushit në Gjykatën e Lartë.
Njëkohësisht, Rakipi ka aktive licensën dhe ushtron funksionin e Avokatit, në kundërshtim me parashikimet ligjore, që ia ndalojnë dy-punësimin.
Shkelja ligjore
Në fund të Korrikut 2020, Bordi i Shkollës së Magjistraturës zgjodhi drejtor Arben Rakipin, ish-Prokuror i Përgjithshëm dhe prej kohësh pedagog i brendshëm në atë institucion.
Me paketën e re ligjore të Reformës në Drejtësi, Shkolla e Magjistraturës është përfshirë në listën e institucioneve që konsiderohej pjesë e qeverisjes së gjyqësorit.
Krahas të drejtave dhe privilegjeve, Drejtori i Shkollës së Magjistraturës ka edhe disa ndalime specifike, të ngjashme me ato të zyrtarëve të drejtësisë, si edhe gjyqtarët e prokurorët.
Në nenin 150 të ligjit “Për organet e qeverisjes së sistemit të drejtësisë”, parashikohet ndër të tjera se;
“Gjatë kohës së qëndrimit në funksion, Drejtori i Shkollës së Magjistraturës gëzon pagën dhe përfitimet e gjyqtarit të Gjykatës së Lartë. Funksioni i Drejtorit të Shkollës së Magjistraturës është i papajtueshëm me çdo funksion tjetër publik, anëtarësimin në partitë politike apo pjesëmarrjen në veprimtaritë e tyre, ose kryerjen e çdo veprimtarie tjetër fitimprurëse, me përjashtim të mësimdhënies dhe veprimtarive me natyrë shkencore”.
Ky parashikim eksplicit ligjor nuk rezulton të jetë zbatuar nga Drejtori i Shkollës së Magjistraturës, Arben Rakipi.
“Boldnews.al” verifikoi të dhënat zyrtare në Qendrën Kombëtare të Biznesit (QKB).
Ai ka qenë i regjistruar edhe si person fizik “Avokat” nën emrin e tij, Arben Rakipi, të cilën e ka ç’regjistruar në 9 Shtator 2020, mesa duket një veprim për të shmangur konfliktin e interesave, por që është i paplotë
Nga hulumtimi rezultoi se Arben Rakipi është aksioner i shumicës (55 përqind të aksioneve) në studion ligjore “Rakipi & Partners”.
Pikërisht, pjesëmarrja aktive në këtë shoqëri e shndërron Drejtorin e Shkollës së Magjistraturës në subjekt të shkeljes së ligjit.
Ligji nr. 9367, dt. 07.04.2005, i ndryshuar “Për parandalimin e konfliktit të interesave”, në nenin 38 të tij parashikon se zyrtarët që gjenden në kushtet e konfiktit të interesave të vazhdueshëm (siç është rasti i Arben Rakipit), “….të ndërpresë, brenda 30 ditëve, ushtrimin e veprimtarive të ndaluara, …. dhe brenda këtij afati, por sa më parë, t’u kërkojë organeve kompetente çregjistrimin sipas ligjit të këtyre veprimtarive…”.
Referuar të dhënave të Qendrës Kombëtare të Regjistrimit, rezulton se, në përfundim të afatit 30 ditor nga emërimi si Drejtor i Shkollës së Magjistraturës (afati përfundonte në fund të Gushtit 2020), Arben Rakipi nuk ka marrë asnjë masë për të hequr dorë nga aktiviteti fitimprurës i “Rakipi & Partnerës”.
Në raste të tilla, Inspektorati i Lartë i Deklarimit dhe Kontrollit të Pasurive, (ILDKPKI), i cili është institucioni përgjegjës për zbatimin e ligjit për parandalimin e konfliktit të interesave, mund të aplikojë gjobën nga 100 mijë deri në 300 mijë lekë të reja.
Gjithashtu, ligji parashikon se, nëse zyrtari nuk e zgjidh vetë konfliktin e vazhdueshëm të interesave, atëherë ndërhyn organi i emërtesës, që në rastin e Rakipit është Bordi i Shkollës së Magjistraturës, për ta lëvizur atë nga ai post pune.
Pasojat abuzive të “konfliktit të interesit”
Dy-punësimi i Arben Rakipit nuk është thjesht dhe vetëm çështje e shkeljes së ligjit. Kjo situatë krijon premisa të shumta për abuzimin nga Rakipi me postin e drejtorit të Shkollës së Magjistraturës për llogari të biznesit të tij.
Arben Rakipi, në cilësinë e titullarit të Shkollës së Magjistraturës, është personi përgjegjës për programin dhe vlerësimin e Formimit të Vazhdueshëm të të gjithë gjyqtarëve dhe prokurorëve të Republikës së Shqipërisë.
Zyrtarët e sistemit të drejtësisë janë të detyruar të ndjekin programet periodike të Shkollës së Magjistraturës dhe vlerësimi mbi pjesëmarrjen dhe aktivizimin e tyre në trajnime u shërben për rritjen apo penalizimin në karrierën e tyre.
Pra, duket qartë se drejtori i Shkollës së Magjistraturës ka një rol jo të vogël në të ardhmen e gjyqtarëve dhe prokurorëve.
Në këto kushte, nuk duket aspak e pamundur që Arben Rakipi të ushtrojë presion apo të “joshë” gjyqtarë e prokurorë që trajtojnë çështjet e klientëve të studios së tij ligjore, për t’u dhënë zgjidhjen sipas interesave të tij.
