Vidhte banesa dhe portofole, arrestohet 46-vjeçari/ Policia i gjen në banesë edhe kanabis

Artur Gjoci, 46-vjeç është arrestuar në Kavajë pasi akuzohet për vjedhje banesash dhe portofolësh. Ai rezulton me precedentë penalë në fushën e narkotikëve.

Nga hetimet ka rezultuar se ai ka kryer disa vjedhje përgjatë tre muajve të verës, ndërsa gjatë kontrollit në banesën e tij i janë gjetur 277 gramë lëndë narkotike kanabis dhe bimë të kultivuar në oborr.

Materialet i kaluan Prokurorisë pranë Gjykatës së Shkallës së Parë Kavajë, për veprime të mëtejshme.

“Kapet dhe arrestohet në flagrancë nga shërbimet e Komisariatit të Policisë Kavajë, një 46-vjeçar që kryente vjedhje banesash dhe portofolash.

46-vjeçari me precedent penal të mëparshëm në fushën e narkotikëve, i cili kryente sërish të njëjtën veprimtari kriminale duke shpërndarë lëndë narkotike në doza të vogla.

Zbardhen dhe dokumentohen 3 raste të vjedhjeve, të cilat dyshohet se janë kryer nga ky shtetas.

Sekuestrohet në banesën e 46-vjeçarit, 277 gramë lëndë narkotike kanabis.

Shërbimet e Komisariatit të Policisë Kavajë, në vijim të punës për parandalimin, evidentimin dhe zbardhjen e rasteve të vjedhjeve të pronës dhe vënien para përgjegjësisë ligjore të autorëve, bazuar dhe në pamjet filmike, arrestuan në flagrancë shtetasin A. Gj., 46 vjeç, banues në Kavajë, i dënuar më parë për veprën penale “Prodhim dhe shitje të narkotikëve”.

LEXO EDHE  Presidenti i Polonisë infektohet me COVID-19

Nga tërësia e veprimeve hetimore të kryera ka rezultuar se ky shtetas është autor i disa vjedhjeve, konkretisht:

– Më datë 26.09.2020 ka vjedhur banesën e shtetasit F. H.

– Më datë 19.07.2020 i ka vjedhur shtetases E. S., çantën e dorës.

-Më datë 28.06.2020 ka vjedhur banesën e shtetasit F.Sh.

Gjatë kontrollit në banesën e këtij shtetasit, Policia gjeti dhe sekuestroi në cilësinë e provës materiale 277 gramë lëndë e dyshuar cannabis sativa si dhe bimë të kultivuar në oborrin e banesës.

46-vjeçari, gjatë marrjes në pyetje ka pranuar autorësinë e vjedhjeve të lartpërmendura dhe të sendeve të kundraligjshme të sekuestruara.

Materialet i kaluan Prokurorisë pranë Gjykatës së Shkallës së Parë Kavajë, për veprime të mëtejshme”, njofton policia.