Gjykata e Posaçme e Apelit ka shpallur vendimin për 2 gjyqtarët e Durrësit: Klinton Spahiun e Petraq Dhimitrin, si dhe dhe Petrit Çenon – ish-gjyqtar në Durrës, por i shkarkuar nga vetingu.
Apeli i gjeti ata fajtor për akuzën e korrupsionit, ndërsa dha ndaj tyre dënime me tre vite burgim, që u konvertuan në shërbim prove për katër vite. Po ashtu, gjykata vendosi që ata të mos ushtrojnë funksione publike për 3 vite.
Shërbim prove është vendosur edhe për biznesmenin Namik Sadik, i akuzuar për korrupsion aktiv.
Sipas akuzës, Namik Sadik kishte sponsorizuar udhëtime jashtë vendit për gjyqtarët, teksa biznesmeni durrsak ishte palë në një proces civil që po shqyrtohej nga ata. Organi i akuzës radhiti si prova udhëtimet në të njëjtën kohë të tre gjyqtarëve me biznesmenin në Itali dhe Spanjë. Në bazë të hetimeve, gjyqtarët kanë udhëtuar për të ndjekur ndeshjen mes Real Madridit dhe Barcelonës në tetor 2014.
Ish-Gjykata e Krimeve të Rënda i dënoi gjyqtarët me nga 3 vite burg secili, por për shkak të gjykimit të shkurtuar atyre iu ul 1/3 e dënimit. Ish-Gjykata e Krimeve të Rënda gjithashtu dha dënim plotësues për gjyqtarët, sipas të cilit, ata nuk mund të ushtrojnë funksione publike për 3 vite.
