Këshilli Politik, i cili po diskuton mbi ndryshimet në Kodin Zgjedhor lidhur me hapjen e listave dhe koalicionet parazgjedhore, duket se është futur në një ngërç, pas paraqitjes së një drafti nga Damian Gjiknuri, përfaqësues i PS-së.
Ndonëse publikisht Edi Rama, Kryeministër dhe Kreu i PS-së, ka deklaruar për hapjen e listave 100%, gjë që më pas e ligji me koalicionet parazgjedhore, duke i mëshuar idesë se formula e tyre duhet të ndryshojë, drafti i propozuar nga Gjiknuri në Këshillin Politik nxjerr zbuluar PS. Kjo për faktin se ato që socialistët i konsiderojnë lista të hapura janë thjesht fasadë apo propogandë, njëlloj sikundë po ndodh me programin e rindërtimit apo çështje të tjera.
Po çfarë propozohet konkretisht nga socialistët si “listë e hapur”?
Propozimi i tyre konsiston në faktin se deputetë nuk zgjidhen kandidatët që fitojnë më shumë vota, por kandidatët që preferohen nga kryetarët e partive. Kjo lidhet me atë që votat i merr subjekti politik që kandidon emrat.
Ndërkohë që me listat e hapura në Parlament duhet të hyjnë kandidatët që mbledhin më shumë vota, sipas propozimit të socialistëve, mandatin e marrin emrat e përzgjedhur nga kryetari, pavarësisht numrit të votave që secili prej tyre grumbullon.
Skema kuptohet më mirë po të shihet grafiku i shpërndarjes së votave në një qark të caktuar. Skema e mëposhtme që përllogarit mandatet në qarkun e Lezhës rrëzon gjithë propogandën që bëhet sot nga Rilindja për gjoja hapjen e listave, ndërkohë që nxjerr zbuluar Kryeministrin lidhur me lojën për koalicionet.
Rama e ka bazuar lojën e koalicioneve parazgjedhore pikërisht te “listat e hapura”, duke pretenduar se nuk mund të ndërtohen koalicione sipas formulës së deritanishme, kur secili subjekt do të ketë listën e tij. Në këtë kuadër, socialistët thonë se koalicionet nuk do të ndalohen, por ato duhet të përfaqësohen me 1 listë të përbashkët, gjë që çon në shkrirjen e partive.
Në anën tjetër propozimi i hedhur nga socialistët në Këshillin Politik kundërshtohet qoftë nga opozita e bashkuar, ashtu edhe nga përfaqësues të “opozitë parlamentare”, që me votat e tyre në Kuvend, duke mbështetur ndryshimet e njëanshme Kushtetuese, i shërbyen drejtëpërsëdrejti lojës së Rilindjes.
