Procesi i rinumërimit për Qarkun e Tiranës, veç mandateve për partitë, kishte interes edhe sa i përket votave preferenciale për kandidatët që do të marrin mandatin, por në fund nuk pati asnjë ndryshim.
Një prej rasteve që kishte interes ishte ai mes Olta Xhaçkës dhe Blerina Gjylametit, ku më 11 Maj, mandatin e 19-të të PS-së në Tiranë e mori e para dhe e dyta do të ngelet jashtë Kuvendit.
Nga numërimi më 11 Maj, Olta Xhaçka arriti të merrte 6 288 vota në total bashkë me diasporën, ndërsa Blerina Gjylameti 6 148 vota dhe diferenca mes tyre ishte vetëm 140 vota.
Pas përfundimit të rinumërimit, Blerina Gjylametit i janë shtuar 19 vota nga 11 Maji, ndërsa Olta Xhaçkës i janë hequr 51 vota. Pra, diferenca mes tyre deri më tani është ngushtuar në vetëm 70 vota, por e pamjaftueshme për të bërë ndryshimin.
Interes kishte edhe “lufta” mes Ornaldo Rakipit dhe Xhemal Qefalisë, por pas rinumërimit këtij të fundit i janë hequr 128 dhe djalit të Aqif Rakipit 136 vota, ku mandati i mbetet sërish këtij të fundit.
Më së shumti vota nga deputetë e zgjedhur të PS-së u janë hequr Ervin Hoxhës 309 vota, Fatmir Xhafajt 234 vota dhe Blendi Gonxhes 179 vota.
Sa i përket kampit blu, pas rinumërimit më së shumti vota i janë hequr Jorida Tabaku, 250 vota, gjithsesi nuk i prishin punë dhe është e vetmja nga lista e hapur e PD-së në Tiranë që e merr mandatin e deputetit. Ilir Alimehmetit që renditej pas saj i janë hequr 139 vota nga rinumërimi.
Kandidatët të renditur më poshtë, Ilir Metës i janë hequr 54 vota, Myslim Murrizit 57 vota, ndërsa Asllan Dogjanit i janë shtuar 22 vota.
Nga numërimi pas 11 Majit, Myslim Murrizi kishte 7 289 vota në total bashkë me diasporën, ndërsa Asllan Dogjani 7 269 vota, me një diferencë me një diferencë vetëm prej 20 votash.
Pas rinumërimit, Myslim Murrizi shkon në 7 232 vota në tital, ndërsa Asllan Dogjani në 7 291 vota në total dhe kemi një “rrokadë” mes tyre në renditje.
Pra, me Ilir Metën në burg, nëse rrethanat do të sillnin në të ardhmen që PD të fuste dy kandidatë burra nga lista e hapur në Kuvend, atëhere ata do të ishin Ilir Alimehmeti dhe Asllan Dogjani, ndërkohë pas tyre do të vinte Murrizi.
KLIKO KËTU PËR T’U NJOHUR ME REZULTATIN E PLOTË
