Lajm i keq/ Vaksina e Oksfordit, një tjetër paciente pëson efekte të rënda anësore

AstraZeneca, kompania britanike multinacionale farmaceutike dhe biofarmaceutike, ka dhënë informacione të tjera rreth testeve klinike për vaksinën anti koronavirus.

Në raportimin e së shtunës, kompania përmendet një pacient i dytë, sërish një femër, që pas marrjes së dozës ka zhvilluar një sëmundje serioze neurologjike. Sipas News York Times, kompania nuk ka dhënë detaje rreth sëmundjejes, e cila ka shtuar shqetësimet mes ekspertëve.

Të dyja gratë që pësuan efektet anësore morën një dozë të vaksinës eksperimentale në Britani, dhe ishte sëmundja e tyre që detyroi AstraZeneca-n që të ndalonte testimet për herë të dytë.

Tashmë testet klinike kanë nisur sërish në Britani, Brazil, Indi, Afrika Jugore, por mbeten të pezulluara në SHBA.

Deri më tani, 18,000 persona kanë pranuar që t’u injektohet kjo vaksinë eksperimentale që po përgatitet nga shkencëtarët e Universitetit të Oksfordit.

Raporti i AstraZeneca thotë se qëllimi i tyre është një vaksinë me 50% efektivitet, një kufi i vendosur nga FDA e SHBA-ve në udhëzimet e lëshuara.

Për të përcaktuar me saktësi statistikore nëse kompania e arrin këtë qëllim, 150 pacientë të konfirmuar me koronavirus duhet të marrin pjesë në teste.

Sëmundja e shkaktuar si efekt anësor, është e rrallë, por serioze dhe ekspertët thonë se incidente të tilla, qofshin edhe sporadike, në një test klinik mund të jetë alarmante.