Kampionati anglez do të vijojë sot me ndeshjet e javës së dytë të sezonit të ri, por nuk mund të thuhet e njëjta gjë për Manchester United, që në orën 18:30 do të zbresin në fushë për herë të parë për një ndeshje zyrtare.
Kalendari parashikonte që “djajtë e kuq” të mos luanin javën e kaluar dhe sonte në mbrëmje skuadra e Solskjaer do të bëjë debutimin zyrtar në shkallët e “Old Trafford”, ku do të presë londinezët e Crystal Palace.
Këta të fundit luajtën javën e kaluar dhe arritën të fitojnë me rezultatin minimal 1-0 përballë Southampton, ndërsa Manchester United do të provojë ta nisë mbarë një sezon ku pretendon të arrijë diçka më tepër se vendi i katërt i vitit të kaluar.
Ndërkohë në orën 21:00, Arsenali i Mikel Artetës, do të zbresë në fushë në “Emirates Stadium” për t’u përballur me West Hamin. “Topçinjtë’ e nisën sezonin me një sukses bindës 0-3 në transfertën ndaj Fulhamit dhe sot do të kërkojnë konfirmimin ndaj një skuadre që militon prej vitesh në Premier League dhe nuk është aspak e lehtë për t’u kaluar.
Gjithsesi trajneri spanjoll mund të bazohet te forma e mirë e kapitenit Aubameyang, i cili pak ditë më parë firmosi edhe kontratën e re me Arsenalin, por edhe blerjet e reja, Willian e Magalhaes, të cilët dhuruan paraqitje mjaft të mira në javën e parë.
Programi i Premier League për ditën e sotme:
Everton-West Brom/ ora 13:30
Leeds-Fulham/ 16:00
Manchester United-Crystal Palace/ 18:30
Arsenal-Fulham/ 21:00
