Ministri i Brendshëm, Sandër Lleshaj, tha mbrëmjen e sotme se grupet kriminale përdorin edhe eksplozivët për të realizuar qëllimet e tyre.
“Mund të jenë edhe celula, që bëjnë biznes kriminal me këtë formë”, tha Lleshaj, duke komentuar ngjarjen e ndodhur pasditen e sotme në Tiranë, ku si rezultat i shpërthimit të një automjeti, mbeti i plagosur 1 person.
I pyetur nëse policia ka dështuar në parandalimin e ngjarjeve kriminale, Lleshaj tha në emisionin “Open” se në rastin konkret ka dështuar.
“Për çdo ngjarje që ndodh, policia dështon. Por çdo ngjarje nuk mund të parandalohet, nuk ndodh në asnjë vend të Botës”, tha Lleshaj.
Sipas tij, sado e rëndë të jetë një ngjarje, ajo mbetet pranë një ngjarje.
“Kjo pamje mund të na ndikojë për momentin, por situata e rendit dhe sigurisë në Shqipëri, nuk është dramatike. Unë s’mund të vijë të qaj sot këtu meqë ndodhi kjo ngjarje”, tha Lleshaj.
