Belinda Balluku u mor këtë të premte e pandehur nga SPAK, në lidhje me paracaktimin e fituesit të tenderit për mbikqyrjen e punimeve që po kryeheshin në tunelin e Llogarasë, me vlerë rreth 2 milion euro.
Por, në kohën kur doli lajmi, Balluku u dërgoi mediave të kapura prej saj një video propaganduese ku udhëtonte me tren nga Zyrihu në Bernë të Zvicrës. Balluku u takua atje me ministrin Federal të Zvicrës për Transportin, Energjinë dhe Mjedisin, Albert Rösti.
E duket se gjatë videos propaganduese, Belinda Balluku e ka bërë një “gabim”. Gjatë rrugës Balluku duket se po studionte CV-në e homologut të saj, siç duket edhe nga letrat që mban mbi tavolinë.
Përpara çdo vizite jashtë vendit, zyrtarëve të lartë u jepet nga stafi i tyre një përshkrim i shkurtër me foto i njerëzve që do të takojnë. Kjo ndodh në rastet kur ata janë pak të njohur publikisht dhe me qëllim që të mos ndodhë ndonjë situatë e pakëndshme gjatë takimeve që zyrtari i lartë të mos e njohë personin që do të takojë.
Por këto dokumente, është e mira të mbahen të fshehta nga sytë e njerëzve të tjerë. Në një rast, kur kancelarja gjermane Angela Merkel tregoi gabimisht njërën prek këtyre dokumenteve para një takimi në selinë e OKB-së, u kryqëzua nga shtypi vendas.
