Nga BoldNews.al
Tre kompani turke, të cilat u shpallën fituese të tenderit 20 miliardë lekë (të vjetra) për rindërtimin e banesave individuale të dëmtuara nga tërmeti i 26 Nëntorit 2019, nuk arritën të paraqesnin brenda afatit ligjor sigurimin e kontratës prej 15%, duke mos arritur të finalizojnë bashkëpunimin me Fondin Shqiptar të Zhvillimit.
Skualifikimi i tyre i hapi rrugën konkurentit të dytë, një bashkim operatorësh i drejtuar nga “Kevin Construction”, e themeluar nga Safet Gjici, kryetari socialist të Bashkisë së Kukësit dhe që aktualisht është në pronësi të vëllait të tij, Lavdrim Gjici.
Fondi Shqiptar i Zhvillimit njofton se bashkimi i kompanive turke “Kaplan Cam Aluminyum…”, “Prefabrik yapi..” dhe “Besgen Muhendislik..”, paraqiti ofertën më të në lotin e parë të tenderit, i cili në total shkon në shifrën e mbi 6 miliardë lekëve të reja.
Por, pas shpalljes së renditjes së konkurentëve, kompanitë turke nuk arritën të dorëzonin sigurimin e kontratës, duke tejkaluar në këtë mënyrë edhe afatin ligjor për nënshkrimin e saj.
Në këto kushte, Fondi Shqiptar i Zhvillimit ka vendosur që të nënshkruajë kontratën me konkurentin e renditur të dytin në radhë, i cili është një bashkim 4 operatorësh shqiptarë, të udhëhequr nga “Kevin Construction”.
Tenderi
Fondi Shqiptar i Zhvillimit shpalli në Prill 2020 tenderin masiv për rindërtimin e disa qindra banesave individuale, të dëmtuara nga tërmeti i 26 Nëntorit në qytetet Durrës, Kamëz, Kurbin, Lezhë, Krujë, Vorë, Kamëz, Kavajë e Rrogozhinë.
Fondi limit, që qeveria shqiptare i akordoi Fondit Shqiptar të Zhvillimit për këtë projekt është mbi 6 miliardë lekë të reja, i ndarë në tre faza.
Fondi Shqiptar i Zhvillimit kishte parashikuar si kritere vlerësimi; 1. Çmimin e ulët (maksimumi 60 pikë); 2. Kohën e zbatimit të kontratës (maksimumi 30 pikë); 3 Cilësinë e punimeve (maksimumi 10 pikë).
Pas një shtyrje gati 6-mujore, e cila u justifikua nga Ministri i Rindërtimit, Arben Ahmetaj, si një kohë e nevojshme për të përgatitur kriteret më të mira për banesat e reja, Fondi Shqiptar i Zhvillimit shpalli këtë fundjavë rezultatet e lotit të parë të tenderit.
Në garë morën pjesë disa prej kompanive më të mëdha të ndërtimit në vend, të cilat janë edhe kontraktorët kryesorë të qeverisë “Rama” në realizimin e punëve publike.
Krahas kompanisë fituese, të themeluara nga Safet Gjici, në tender ishin pjesëmarrës edhe “G.P.G Company”, “Gjikuria”, “2T”, “Gener 2”, “Alb Building”, “Vëllezërit Hysa”, e disa të tjera.
Në përfundim të procedurës, bashkimi i 3 operatorëve turq u shpall i suksesshëm, me ofertën 1.8 miliardë lekë të reja, pa TVSH. Për shkak të mosplotësimit në kohë të dokumenteve, operatori i renditur i pari humbi të drejtën për të nënshkruar kontratën.
Pas kompanive turke, ishte renditur bashkimi i operatorëve i drejtuar nga “Kevin Construction”, me një ofertë financiare 1.7 miliardë lekë të reja, i cili fitoi të drejtën për të nënshkruar kontratën me Fondin Shqiptar të Zhvillimit.
Ndërkohë, u skualifikuan për shkak të ofertës më të lartë se fondi limit 3 kompani pjesëmarrëse, “Gener 2”, “Alb Building” dhe “2T.
Gjici fitues
“Kevin Construction”, kompania e cila udhëheq bashkimin e operatorëve fitues të tenderit 20 miliardë lekë (të vjetra me TVSH), është krijuar në vitin 2006 nga biznesmeni Safet Gjici, aktualisht kryetar i Bashkisë së Kukësit.
Kompania ka marrë emrin e djalit të vogël të Gjicit, i cili ka lindur në të njëjtin vit që ajo është krijuar dhe regjistruar në Qendrën Kombëtare të Biznesit (QKB).
Në 27 Mars 2014, kryeministri Edi Rama e emëroi Safet Gjicin në detyrën e Prefektit të Qarkut të Kukësit.
Një ditë më pas, në 28 Mars 2014, Safet Gjici vendos t’ia dhurojë 100 përqind të aksioneve të kompanisë vëllait të tij, Lavdrim Gjici, për shkak të ndalimeve të parashikuara në ligjin për Konfliktin e Interesave.
Që prej asaj kohe, “Kevin Construction”, zyrtarisht, është në pronësi të Lavdrim Gjicit, ndërkohë që themeluesi i saj, Safeti, mori detyrën e kryetarit të Bashkisë së Kukësit në votimet mono-partiake të 30 Qershorit 2019.
