E arrestuar për 6 mijë euro ryshfet, KLGJ pezullon nga detyra gjyqtaren Margjeka

Këshilli i Lartë Gjyqësor vendosi sot të pezullojë nga detyra gjyqtaren Mimoza Margjeka, pasi kjo e fundit u vendos në arrest shtëpie, e dyshuar për marrjen e një ryshfeti nga një i pandehur për trafik klandestinësh.

Hetimi ndaj Margjekës u krye nga SPAK, i cili konkludoi se bashkëshorti i saj Arben Cara, profesor i drejtësisë në Universitetin e Durrësit, mori 6 mijë euro nga familjarët e një të pandehuri.

“Në përfundim të mbledhjes, pasi u njoh me vendimin e marrë nga Gjykata e Posaçme e Shkallës së Parë për Korrupsionin dhe Krimin e Organizuar, Këshilli vendosi pezullimin nga detyra të magjistrates {…}, me detyrë gjyqtare në Gjykatën e Rrethit Gjyqësor {…}, caktuar në skemën e delegimit në Gjykatën e Apelit {…},” thuhet në njoftimin për shtyp të Këshillit të Lartë Gjyqësor.

Pesë persona u arrestuan ose u vendosën në masë sigurie arrest shtëpiak nga gjykata me kërkesë të SPAK të mëkurën e kaluar. Mimoza Margjeka, e cila është komanduar në gjykatën e Apelit Korçë, dyshohet se mori 6 mijë euro përmes bashkëshortit Arben Cara për të lehtësuar masën e sigurisë së një personi të ndaluar në Pogradec për veprën penale Ndihmë për kalim të paligjshëm të kufijve.

LEXO EDHE  Alibeaj: Ja skema e manipulimit të Edi Ramës me listat e votuesve

Tre shtetas Nejton Bali, Klaudjo Zhilla dhe Skënder Demiraj, ky i fundit avokat u arrestuan pasi, sipas hetuesve, i dhanë bashkëshortit të gjyqtares shumën prej 6 mijë eurosh. Pas transferimit të shumës, Gjykata e Apelit të Korçës ndryshoi masën e sigurisë së Orion Balit, i cili ishte ndaluar në korrik të këtij viti duke transportuar 14 emigrantë të paligjshëm nga Korça për në drejtim të kufirit malazez.