Le Monde, media franceze, e cila është më pro të majtës, i ka kushtuar një artikull kritik Kryeministrit Edi Rama, veçanërisht përsa i takon politikave të ndjekura prej tij, që kanë shtuar emigrimin e shqiptarëve në vendet e BE.
Rama trajtohet në artikull si një artist vizual, që herë shfaqet si një partner i domosdoshëm i BE-së dhe gjithashtu është një mik i Presidentit turk, Erdogan.
“Edi Rama ka ndjekur politika më agresive neoliberale sesa fqinjët e tij ballkanas apo paraardhësit e tij të PD”, shkruan Le Monde, duke shtuar “ai ka ndërmarrë shkurtime të shpenzimeve publike dhe partneritete publike-private në arsimin e lartë, turizmin, shëndetësinë dhe punët publike deri më tani sa që FMN e ka kritikuar’.
Në fillim të artikullit, Le Monde shkruan se “Edi Rama, drejtuesi i Partisë Socialiste dhe kryeministër që nga viti 2013, është ithtari kryesor i ‘mrekullisë ekonomike shqiptare’ për të cilën ai flet në Itali”.
“Ai pretendon se, pas dekadave të emigrimit, Shqipëria është tani një destinacion i ri për investitorët dhe madje edhe për fuqinë punëtore migratore italiane.
Por statistikat tregojnë se që nga viti 1989 Shqipëria ka pasur shkallën më të lartë të emigracionit në Evropë, me migrim neto shumë negativ në 2018 dhe 2019”, thuhet në artikullin e medias pariziene.
Sipas Le Monde, Rama bën një lojë të shkëlqyeshme të jetës së tij të mëparshme si një artist vizual, madje në samitet ndërkombëtare kultivon imazhin e tij si një ‘përçarës’ dhe si partneri i domosdoshëm i BE-së, veçanërisht në luftën kundër terrorizmit islamik dhe qëllimn për të stabilizuar Ballkanin.
“Kjo çon në kontradikta: pavarësisht se është ateist dhe një avokat entuziast i anëtarësimit në BE, Rama është gjithashtu një mik i Presidentit të Turqisë Erdogan dhe ishte i lumtur të përjashtonte mësuesit Gylenist me kërkesën e Turqisë”, shprehet ai.
Më tej artikulli i Le Monde ndalet edhe tek ndërhyrja brutale e Teatrit, ku edhe në këtë rast, ka dyshime për ligje e vendime klienteliste, që pas shembjes së një monumenti kryesor në Tiranë fshiheshin interesa për të ndërtuar kulla nga Shkëlqim Fusha.
Në artikull theksohet se pa një alternativë dhe shoqëri të kontrolluar fort nga autoritetet dhe kontaktet e tyre të ngushta të biznesit, shqiptarët tundohen të emigrojnë.
