Partia Demokratike kundërshton ligjin për ndarjen e Shqipërisë në 4 rajone dhe e konsideron antikushtetues.
Ish-deputetja e Partisë Demokratike Dhurata Çupi tha sot se PD është kundër ligjit për ndarjen e Shqipërisë në 4 rajone dhe do ta shfuqizojë pasi është kundër interesit të qytetarëve.
“Vendimi i qeverisë për të rrëzuar dekretin e Presidentit për ligjin antikushtetues të rajoneve nuk i shërben interesit të vendit”, tha ajo.
Po ashtu, Çupi shton se “nga 61 bashki gjithsej, qytetarët e 57 prej tyre duhet të shkojnë të marrin shërbim larg, pasi vetëm 4 bashki-qendër rajoni mund ta ofrojnë një shërbim të caktuar. Kjo do ta bëjë edhe më të vështirë sesa tani komunikimin mes pushtetit lokal dhe qytetarëve. Në këtë mënyrë, qeveria përqendron pushtetin me të emëruarit e saj, duke dëmtuar rëndë interesin publik”.
“Ligje të tilla do të shfuqizohen me marrjen e drejtimit të qeverisjes nga Partia Demokratike. Qytetarët do të prekin shumë shpejt përfitimet e punës së tyre, do të marrin shërbim pranë qendrave të tyre, do të trajtohen si qytetarë europianë, me dinjitet dhe respekt nga shteti”, theksoi ajo në një reagim në rjetet sociale.
