Policia e Lucernit ka kryer të mërkurën një inspektim në një kantier ndërtimi në qytetin e Lucernit dhe një tjetër, në Entlebuch. Gjashtë persona janë arrestuar me këtë rast pasi që nuk kishin leje të vlefshme pune, shkruan zentralplus.ch
Sipas policisë së Lucernit, janë kontrolluar një numër personash që punonin në kantieret në fjalë, transmeton albinfo.ch. Policia për të realizuar kontrollet, me këtë rast ka bashkëpunuar me inspektoratin kantonal industrial dhe tregtar si dhe me Zyrën për Migracionin (Amigra).
Gjithsej gjashtë persona, të gjithë punëtorë me hekura montimi, nuk kishin leje të vlefshme pune. Për këtë arsye ata u arrestuan nga policia.
Dy prej tyre janë identifikuar me dokumente të falsifikuara të identitetit. Pesë nga këta gjashtë persona, Zyra për Migracion (Amigra) i ka dëbuar nga Zvicra dhe u ka ndaluar hyrjen në të gjithë zonën Shengen për dy deri në tre vjet, përcjell albinfo.ch. Një person është marrë gjithashtu në paraburgimin për dëbim.
Të gjashtë personat, nga Irani, Serbia dhe Kosova, të moshës midis 20 dhe 38 vjeç, ishin të punësuar nga kompanitë me seli në Zvicër. Meqë ishin punësuar ilegalisht, drejtorët e tyre administrues do të raportohen për shkak të shkeljeve të ndryshme të Ligjit për të Huajt dhe Integrimin (AIG).
Hetimet janë duke u kryer nga prokurorët publik në Lucern dhe Sursee.
