U arrestua në Elbasan, italianët lirojnë gabimisht të akuzuarin për vrasjen e dyfishtë

Më 4 Korrik 2019, policia e Elbasanit njoftoi arrestimin e 51-vjeçarit Sokol Taçi, pasi ndaj tij rëndonte një masë sigurimi “arresti me burg” për veprën penale “vrasje me paramendim”.

Këtë të Diel, mediat italiane raportuan se ai u lirua nga autoritete në shtetin fqinjë për shkak të një gabimi në përllogaritjen e afateve.

Pas arrestimit në Shqipëri, Sokol Taçi alias Sokol Taçe e Veap Dehari, u ekstradua drejt Italisë më 17 Nëntor 2019.

Më 10 tetor 1998, Sokol Taçi akuzohet se ka ekzekutuar me armë zjarri jashtë një lokali në Osio Sotto, vëllezërit Flamur dhe Astrid Kolaveri, në atë kohë 26 dhe 27 vjeç. Vrasja, sipas hetuesve italianë, ka lidhje me konfliktet e lindura nga aktiviteti i jashtëligjshëm i prostitucionit.

Të Premten më 4 Shtator, i akuzuari 51-vjeçar, u lirua nga burgu për shkak të skadimit të afateve të paraburgimit, ndërsa seanca e radhës ndaj tij është planifikuar të zhvillohet më 22 shtator. Por, siç raporton “Corriere”, afati është llogaritur gabim, sepse skadon në 19 Janar 2021.

LEXO EDHE  I dënuari në Itali për trafik heroine, prej vitesh doganier në Durrës
Sokol Taçi

Arrestimi në Elbasan

Sokol Taçi është vënë në pranga në Elbasan më 3 Korrik 2019, ndërsa një ditë më parë, policia informoi për vënien e tij në pranga.

“Strukturat e Drejtorisë Vendore të Policisë Elbasan në bashkëpunim me Drejtorinë Hetimore në Departamentin e Policisë Kriminale dhe Interpol Tirana, pas një pune të mirorganizuar dhe profesionale, në bazë të informacioneve të marra, bënë kapjen dhe arrestimin e përkohshëm me qëllim ekstradimin drejt Italisë të shtetasit shqiptar të shpallur në kërkim ndërkombëtar: S. T., (alias V.D.,) 50 vjeç, lindur dhe banues në Elbasan. Kapja dhe ndalimi i tij u bë pasi Gjykata e Bergamos në Itali ka vendosur masën e sigurisë ‘Arrest në burg’, për veprën penale ‘Vrasja me paramendim’”, njoftoi policia.

Në media u raportua se babai i tre djemve, dy prej të cilëve binjakë, ishte i papunë. Për shkak të së kaluarës së tij të errët, ai nuk publikonte asnjë foto në rrjetet sociale, përveç shfaqte imazhe makinash.

/BN/