Drejjtuesi i Lëvizjes Vetëvendosje në Shqipëri, Boiken Abazi, ka shprehur dyshimet lidhur me njohjen si shtet të Kosovës nga Izraeli, duke u shprehur se nuk ka ende një garanci në këtë proces.
Në një postim në rrjetet sociale, ai shprehet se Izraeli nuk ka nënshkruar asgjë në këtë drejtim, dhe se këta të fundit pretendojnë edhe për pronat e hebrenjve në Kosovë.
“Izraeli mund të vendosë hapjen e një zyre ndërlidhëse në Prishtinë “Liason Office”, siç e ka dhe Greqia, pa e njohur zyrtarisht pavarësinë e Kosovës, dhe këtë Hoti me shokë mund ta quajë edhe si “normalizim marrëdhëniesh diplomatike”. Megjithatë, mbetet për t’u parë.”, shprehet Abazi.
Reagimi i Boiken Abazit, vjen pas takimit të së premtes në Shtëpinë e Bardhë mes Kosovës dhe Serbisë, ku u arrit marrëveshja ekonomike. Në të njëjtën ditë Presidenti amerikan Donald Trump njoftoi se Izraeli do të njohë Kosovën, ndërsa kjo e fundit do të vendosë ambasadën e saj në Jeruzalem, vendim që shkaktoi reagimin e menjëhershëm të Turqisë.
Reagimi i plotë:
Duhet kuptuar se nuk ka ende asnjë garanci që Izraeli do ta njoh pavarësinë e Kosovës:
Izraeli nuk ka nënshkruar asgjë në këtë drejtim.
Izraeli e ka bërë të qartë se ka disa gjëra paraprake që duhet të ndodhin në lidhje me pronat e hebrenjve gjatë Luftës së Dytë Botërore në Kosovë para se te merret një vendim.
Izraeli mund të vendosë hapjen e një zyre ndërlidhëse në Prishtinë “Liason Office”, siç e ka dhe Greqia, pa e njohur zyrtarisht pavarësinë e Kosovës, dhe këtë Hoti me shokë mund ta quajë edhe si “normalizim marrëdhëniesh diplomatike”. Megjithatë, mbetet për t’u parë.
