Ndërkohë që kryeministri vijon të pushojë i pashqetësuar në plazhet e jugut dhe hesht për situatën kaotike në kufirin me Greqinë, ministrja e Mbrojtjes, Olta Xhaçka, thotë se autoritetet vijojnë komunikimet me Qeverinë greke për të pasur lehtësim të procedurave për kalimin e qytetarëve, të cilët vijojnë të qëndrojnë të bllokuar në rrugë prej 4 ditësh.
“Autoritetet diplomatike janë në komunikim të vazhdueshëm me palën greke për lehtësimin e procedurave, ndërkohë Forcat e Armatosura e kanë gdhirë me qytetarët që qëndrojnë në radhë në Kakavijë duke ofruar ndihmë shëndetësore, ndihma ushqimore, ujë të pijshëm dhe asistencë për higjienën sanitare në terren. FA në krye të detyrës!”, shkruan Xhaçka në rrjetin social.
Ndërkohë nga Ministria e Jashtme shqiptare i vetmi njoftim është ai i Gent Cakajt, i cili tregonte se kishte folur në telefon me homologun grek, për zgjatjen e orarit të punës nga doganierët helenë.
