Sot është dita e katërt që mijëra shqiptarë presin në kufijtë tokësorë me Greqinë për tu kthyer në vendet ku jetojnë dhe punojnë, ndërsa veçanërisht në Kakavijë është krijuar një katastrofë humanitare.
Gra, fëmijë e të moshuar janë lënë në mëshirë, ndërsa Qeveria duket tërësisht e paaftë për të zgjidhur situatën, madje edhe për të negociuar.
Gent Cakaj, ministër i Jashtëm në detyrë, është mjaftuar me një reagim në rrjetet sociale, Olta Xhaçka, ministre e Mbrojtjes, ka udhëtuar drejt Kakavijës, jo për t´u ardhur në ndihmë qytetarëve, por për të verifikuar nëse janë me mijëra sikundër raportojnë mediat, apo jo.
Pas konstatoi se mediat kanë të drejtë, Xhaçka zgjodhi të takohet me disa drejtues lokalë dhe t´u japë një bot me ujë qytetarëve që presin me orë të tëra në rradhë.
Edi Rama nuk reagoi deri në mëngjesin e sotëm, kur në rrjetet sociale, preferoi të flasë për projektet e rindërtimit, por jo për atë që po ndodh në Kakavijë, ku rradha e automjeteve ka arritur mbi 25 km.
“MIRËMËNGJES
dhe me një përqafim nga larg, për nxënësit, prindërit, mësuesit e shkollës “Neim Babameto” në Durrës, disa prej të cilëve atë ditë pas tragjedisë i gjeta të përlotur në oborrin ku shkolla qe kthyer në një shëmbëlltyrë të rrënimit të gjithandejshëm, ju uroj të gjithëve ju një ditë të mbarë” (Edi Rama)”, shkruan Rama mëngjesin e sotëm.
Dhe pas këtij statusi, pyetja që lind është: pse autoritetet greke duhet të punojnë edhe natën apo të përshpejtojnë kalimet, kur Rama bën sikur nuk i shikon ato mijëra emigrantë që presin në kufi?
Një Kryeministër normal minimalisht do të reagonte publikisht lidhur me trajtimin që po u bëhet shtetasve të vendit që drejton. Një burrë shteti do të gjente një mënyrë për të shkuar në Athinë për të diskutuar me homologun e tij, ndërsa një zyrtar i OSBE minimalisht do të ngrinte zërin për trajtimin e shtetasve shqiptarë përtej çdo imagjinate.
Dikur shfaqej si babai i dhembshur i shqiptarëve që po i mbronte nga koronavirusi, ndërsa sot duket se ka zgjedhur të mbyllë sytë e gojën.
