Një aksident me pasojë vdekjen e një fëmije 10 vjeç ka ndodhur këtë të shtunë në Kakavijë.
Një autoambulancë ka përplasur një fëmijë i cili si pasojë e plagëve të marra ka humbur jetën. Ambulanca raportohet se ka qenë me shpëjtësi duke transportuar një të sëmurë për të marrë ndihmë mjeksore, kur ka përplasur fëmijën. Sipas dëshmitarëve, mjeti ka qenë me shpejtësi. Fëmija i cili ka humbur jetën, ishte në radhë me familjen, në pritje për të kaluar kufirin për të shkuar në Greqi.
“Rreth orës 10:30, në aksin nacional Kakavije – Gjirokastër, në afërsi të kthesës së Bularatit, një autoambulancë me drejtues shtetasin A. G, që po transportonte një shtetase të sëmurë për në spitalin rajonal Gjirokastër, ka përplasur këmbësorin, shtetasin S. N., 10 vjeç, banues në Lezhë, i cili ka humbur jetën. Drejtuesi i ambulancës është shoqëruar për në ambientet e Komisariatit të Policisë Gjirokastër, ndërsa shtetasja e sëmurë është transportuar me makinë policie drejt spitalit rajonal Gjirokastër. Në vendngjarje ndodhet grupi hetimor dhe po punon për zbardhjen e plotë të ngjarjes”, njoftoi policia.
Situata në Kakavijë vijon të mbetet kaotike prej katër ditësh, me radhët e makinave që sa vijnë e shtohen, në pritje për të kaluar kufirin për në Greqi. Disa prej qytetarëve, janë shprehur se kanë tre ditë që presin në radhë dhe në temperatura të larta. Shumë prej tyre kanë shfaqur shqetësime shëndetësore dhe ka pasur nga ata që janë transportuar në spital.
Radhët janë shtuar për shkak të rregullave të palës greke, që e mbyll doganën gjatë natës dhe nuk lejon asnjë udhëtar të kalojë kufirin pa bërë më parë testin e COVID. Autoritetet shqiptare ndërkohë mbeten të pafuqishme për ti dhënë zgjidhje situatës. Përveç Kakavijës, edhe në pikën tjetër kufitare me Greqinë – Kapshticë – situata shfaqet problematike.
