Formulari me 40 faqe, ja çfarë duhet të plotësojnë emrat e propozuar për deputet nga PD

Të gjithë kandidatët e propozuar nga baza apo anëtarësia e PD do t´i duhet të plotësojnë një formular me 40 faqe, i cili është ndërtuar nga pyetjet e thjeshta te ato që mund të cilësohen si delikate.

Nga ky proces shpëtojnë ish-Presidentët, ish-Kryeministrat, ish-Kryetarët e Kuvendit, nënkryetarët, sekretarët e Përgjithshëm, ish-kryetarët dhe të gjithë ata që kanë mbajtur funskione të larta drejtuese.

Secili prej personave që plotëson formularin duhet të tregojë nëse ka ndryshuar ndonjëherë emrin ose mbiemrin dhe arsyen se përse e ka bërë. Pyetësori merr informacione edhe për tre miq të ngushtë të kandidatit, të cilët kanë informacion të detajuar rreth tij dhe duhet të kenë njohje së paku 7 vite. Kandidati duhet të rendisë të paktën 3 emra dhe të dhënat bashkëshoqëruese. Ndërsa më tej, formulari kërkon informacion për aktivitetet jashtë Shqipërisë dhe njohjet jashtë vendit.

Formulari që duhet të plotësojnë kandidatët kërkon edhe informacione, të cilat po i konsiderojmë si delikate, pasi kërkohet nëse personi që e plotëson atë ka pasur apo jo ndonjëherë probleme mendore dhe a ka kërkuar konsultim me psikologun apo psikiatrin. PD-ja kërkon të marrë informacion nëse kandidati ka përdorur ndonjëherë lëndë narkotike apo nëse ka tregtuar dhe kultivuar ndonjëherë më parë lëndë narkotike. Një tjetër pyetje lidhjet me konsumimin e alkoolit në atë masë sa të jetë bërë problem për mbarëvajtjen në punë.

LEXO EDHE  Vrasja e Komisar Artan Cukut/ Familjarët padisin Policinë e Shtetit! Ja arsyeja

Më tej, formulari i PD-së mbledh informacionet që kërkon formulari i dekriminalizimit në shtet, që lidhen me gjendjen gjyqësore të kandidatit. Përpos të dhënave në pastërtinë e figurës, përmes këtij procesi PD-ja kërkon të marrë informacionin e nevojshëm për kandidatin në lidhje me arsimimin, eksperiencat në punë dhe marrëdhëniet me kolegët. Në formular nuk mungojnë pyetjet për çështjen e pasurisë.

“Përshkruani hollësisht: llojin, sipërfaqen, adresën ku ndodhen, vitin e krijimit, vlerën në lekë apo në valutë që pasqyrohet në dokumentacionin që dispononi, çmimin e blerjes, në mungesë të dokumenteve shumën e shpenzimeve që keni kryer, pjesën takuese që zotëroni dhe burimet e krijimit të çdo lloj pasurie të regjistruar ose jo në regjistrat publikë.

Objekt i deklarimit sipas kësaj pjese janë të gjitha pasuritë e akumuluara ndër vite deri në datën e dorëzimit të këtij formulari, burimet e krijimit të tyre dhe të drejtat reale mbi to, të ndodhura brenda dhe jashtë vendit.

Kandidatët që shmangin qoftë edhe një pyetje skualifikohen, pra nuk mund të vijojnë procesin.

Formularët do të merren në shqyrtim nga Komisioni për verifikimin e kandidatëve dhe mendohet se deri në muajin shtator të ketë një listë, e cila do të përbëjë edhe bazën e kandidatëve zyrtarë të PD për zgjedhjet e ardhshme parlamentare.