Vllaznia-Besëlidhja, përballen sot në “play-out-in” që do të përcaktojë skuadrën që do të luajë sezonin e ardhshëm në Kategorinë Superiore.
Klubi shkodran ka zhvilluar një edicion me shumë luhatje, ku problemet kanë qenë të ndryshme, nga gjendja fizike, tek bojkoti për mos shlyerjen e pagave. Gjithsesi ky sezon problematik mund të shpëtohet, deri diku, duke qëndruar në Superiore e më pas për të ndërtuar një ekip të denjë me ndihmën e sponsorit Alban Xhaferri.
Nga ana tjetër për klubin lezhjan ky është shansi i madh për t’u rikthyer në elitën e futbollit shqiptar pas një mungese 12-vjeçare.
Vllaznisë i rikthehet nga pezullimi 4-javor Renato Malota dhe do të jetë pikërisht lezhjani i shkodranëve ai që do të jetë pika kryesore në mbrojtjen e kuqebluve, kurse në fazën e avancuar, përveç Sidorencos, do të jenë edhe Silvio Zogaj e Junior.
Në krahun tjetër, vjen një ekip që për të mbërritur deri këtu iu desh punë, konkurroi me Kastriotin për ngjitjen e menjëhershme, por nuk ia doli, e më pas eliminoi në Pogradecin për të siguruar play-out-in. Ka qenë një edicion i veçantë për Besçlidhjen, që kulmin e pati në çastin kur lezhjanët eliminuan nga Kupa, në atë kohë, skuadrën kampione të Shqipërisë, Partizanin.
Vllaznia-Besëlidhja luhet në orën 19:00 në stadiumin “Loro Boriçi”.
