Ndeshja e Playoff-it mes Vllaznisë dhe Besëlidhjes sfidon finalen e Kupës, ja plani i FSHF-së

Siç u bë e ditur edhe ditën e djeshme ndeshja e Playoff-it mes  Vllaznisë dhe Besëlidhjes do të luhet ditën e diel për të përcaktuar skuadrën e 10-të të Superiores për sezonin e ardhshëm.

Fillimisht kjo ndeshje ishte parashikuar të luhej më 5 ose 6 gusht por FSHF-ja ka ndryshuar qëndrim. Në fakt duket e pakuptimtë kjo datë, për shkak se në të njëjtën ditë, një orë më pas, prej orës 20:00, luhet edhe finalja e Kupës së Shqipërisë në “Air Albania Stadium”.

Njoftimi i FSHF-së:

“Do të luhet të dielën (2 gusht) në stadiumin “Loro Boriçi” ndeshja play-off KF Vllaznia-Besëlidhja. Sfida, që do të nisë në ora 19:00, do të përcaktojë skuadrën që do të luajë në Kategorinë Superiore sezonin e ardhshëm.

KF Vllaznia vjen në këtë përballje pasi u rendit në vendin e 8-të të Kategorisë Superiore në edicionin 2019/2020 me 46 pikë të grumbulluara në 36 javë.

Ndërsa Besëlidhja u rendit e dyta në Grupin A të Kategorisë së Parë dhe u përball të mërkurën në ndeshjen e parë play-off me KF Pogradecin, që e përfundoi sezonin në vendin e dytë të Grupit B. Ky takim u fitua nga skuadra lezhjane me rezultatin 3-2.

Sakaq, janë dhënë edhe verdiktet e tjera të edicionit 2019/20 në Kategorinë Superiore. KS Luftëtari dhe Flamurtari FC zbresin në Kategorinë e Parë sezonin e ardhshëm, ndërsa FK Apolonia dhe KS Kastrioti ngjiten në Kategorinë Superiore”, shkruan FSHF.

LEXO EDHE  Buzëqesh Brdaric, Vllaznisë i kthehen 4 lojtarë për ndeshjen kundër Kukësit