Sezoni i Tiranës mbyllet me një barazim 1-1 kundër Bylisit. Bardheblutë të shpallur kampionë të superligës 10 ditë më parë e mbyllin sezonin 2019-2020 në kuotën e 70 pikëve.
Ditën e sotme, skuadra e drejtuar nga Egbo, nuk shkuan më shumë se një barazim 1-1 kundër Bylis në “Air Albania”.
Goli i parë u shënua nga Michael Ngoo. Anglezi dërgoi me kokë në rrjetë krosin e Idriz Bathës në minutën e 21-të. Goli nr 13-të në kampionat për “gjigantin” e sulmit të Tiranës.
Rastet nuk munguan në këtë takim, ashtu si edhe shtyllat. Murataj për Bylis dhe Hasani për vendasit, u frenuan nga shtyllat, ndërsa i pafat ishte edhe Aladin Sallaku i ekipit të Dovedan, gjuajta e të cilit çerek ore përpara fundit u përplas në traversë.
Gjithsesi, 25-vjeçari ia doli të gjente golin në minutën e dytë shtesë, pas një goditje të fortë nga jashtë zonës.
Pas ndeshjes Tirana nisi edhe festën e titullit të 25-të në karrierën e tyre dhe të parën pas plot 11-viteve.
