Ish-deputeti dhe ish-ministri i Shëndetësisë, Vangjel Tavo, ka denoncuar në rrjetet sociale largimin nga puna të 73 personave, personel mjekësor nga QSUT.
“Vazhdojnë PPP-të dhe ja dëmi ndaj bluzave të bardha – 73 të larguar nga puna!
Ky është shpërblimi që qeveria e paaftë u jep bluzave të bardha. Heronjtë e heshtur hiqen nga puna e detyrohen nga ky shtet të emigrojnë në Gjermani e në vende të tjera.
Turp! Mbroni bluzat e bardha dhe jo PPP-të tuaja tek të cilat jeni vërsulur me garuzhde.
Turp!”, shkruan Tavo, duke publikuar edhe dokumentin e mëposhtëm.
Referuar dokumentit bëhet fjalë për stafin mjekësor të laboratorëve, përsfshi këtu edhe atë të mikro-biologjisë. Kjo PPP është dhënë në 2016, kohë kur u kundërshtua nga stafet mjekësore, që edhe protestuan.
Në atë kohë, Ministria e Shëndetësisë sqaronte se mjekëve në këtë sektor, nuk do t’u cënohet kontrata e punës, ndërsa ka siguruar se ky partneritet publik privat do të zgjerojë dhe përmirësojë ndjeshëm cilësinë e shërbimeve.
“Ju bëjmë me dije se mjekët e punësuar në laboratorët e spitaleve do të vazhdojnë të kenë një kontratë me spitalet publike. Disa do të punojnë në laboratorët që do të jenë brenda mjediseve të spitaleve publike, dhe do të drejtojnë procesin mjekësor të laboratorëve, dhe disa të tjerë do të punojnë me mjekët e spitalit për të interpretuar gjetjet laboratorike dhe përmirësuar diagnozat. Teknikët laboratorikë do të punësohen nga kompania që do të krijohet specifikisht për zbatimin e kontratës së PPP-së”, deklaronte Ministria.
Por duket se kjo deklaratë ka mbetur vetëm në letër pasi bazuar në dokumentin e mëposhtëm, 73 vetë, personel mjekësor, duhet të largohen nga puna.
