Mes masave të reja të miratuara nga qeveria e Kosovës, për parandalimin e koronavirusit, bie në sy mbyllja e sportit, prej kësaj të enjteje, datë 30 korrik.
Pas kërkesës së Ministrisë së Shëndetësisë, qeveria vendosi “të ndalohen veprimtaritë rekreative, kulturore dhe sportive në mjedise të mbyllura dhe të hapura në të gjithë territorin, duke përfshirë shkollat e futbollit dhe sportet e tjera, si edhe stërvitjet”.
Një vendim që krijon pasiguri për sezonin e ri sportiv, e që shkaktoi shumë pakënaqësi. Kjo edhe për faktin se mbyllja e sportit u shoqërua me vendimin për të lejuar funksionimin e palestrave dhe pishinave të mbyllura, të cilat kanë rrezik më të lartë infektimi se aktivitetet sportive të organizuara konform protokolleve shëndetësore.
