Këshilli i Lartë i Prokurorisë pritet të formalizojë nesër, gjatë mbledhjes së tij, emërimin e kreut të BKH-së, Aida Hajnaj-Veizaj.
Duke qenë se SPAK ka çuar vetëm një emër në KLP për kreun e BKH-së, duket se vendimi do të jetë formal dhe pa surpriza, aq më shumë kur pati një reagim të menjëhershëm nga Ambasada e SHBA, që përshendeti përzgjedhjen nga ana e Prokurorisë Speciale.
Listat e kandidatëve që aplikuan për kreun e BKH u filtrua për të mbërritur në fund me katër kandidatë, Aida Hajnaj, Artur Beu, Ervin Hodaj dhe Idajet Faskaj, të katër me formim policor.
Por SPAK ka përjashtuar tre kandidatët e tjerë dhe ka vendosur që t’i propozojë KLP-së vetëm emrin e Hajnës, e cila nëse do të zgjidhet do të ketë një mandat 5-vjeçar.
Menjëherë pasi Hajnaj të marrë pëlqimin e KLP-së, Prokuroria e Posaçme Kundër Krimit dhe Korrupsionit do të nisë procesin për përzgjedhjen e 60 hetuesve të kësaj strukture.
Byroja Kombëtare e Hetimit është njësia hetimore e SPAK dhe ka një ngjashmëri me FBI-në amerikane, e cila heton krime të nivelit të lartë në Shtetet e Bashkuara.
Për këtë arsye hetuesit dhe drejtuesi i BKH-së do të trajnohen për tre muaj në akademinë e FBI-së në Virxhinia.
