Nga Boldnews.al
Inspektorati i Lartë i Drejtësisë (ILD) ka nisur verifikimet për Donika Prelën, nën dyshimet se ajo ka vepruar në kushtet e konfliktit të interesav gjatë hetimeve për shtetasit V.M dhe A.M, vëllezërit e Natasha Mulajt, e cila drejton trupën gjykuese në Kolegjin e Posaçëm të Apelimit që po shqyrton kërkesën e Komisionerit Publik për shkarkimin e prokurores.
Kryeinspektori Artur Metani konfirmoi për “Boldnews.al” se, institucioni që ai drejton, ka vendosur të shqyrtojë rastin e ish-drejtueses së Krimeve të Rënda, aktualisht prokurore në Tiranë.
Në një komunikim zyrtar me redaksinë, Metani shprehet se rasti “do të shqyrtohet administrativisht nga Inspektori i Lartë i Drejtësisë, në përputhje me parashikimet e Pjesës V, Kreu II të ligjit nr. 96/2016 “Për statusin e gjyqtarëve dhe prokurorëve në Republikën e
Shqipërisë”.
Situata e dyshuar e konfliktit të interesit u shfaq nga vetë Donika Prela, në seancën e parë gjyqësore në Kolegjin e Posaçëm të Apelimit, në 17 Korrik 2020.
Në hyrje të seancës, subjekti Prela kërkoi përjashtimin e kryetares së trupës gjykuese, Natasha Mulaj, me argumentin se, si prokurore në Tiranë, ka nën hetim vëllezërit e gjyqtares.
Kërkesa e Prelës pritet të shqyrtohet nga një tjetër trupë gjykuese, ndërkohë që “Boldnews.al” ngriti dyshime, mbështetur në dokumenta zyrtarë, mbi vërtetësinë e deklarimeve të prokurores.
Nga të dhënat e siguruara nga redaksia, krijohen dyshimet e forta se, për rastin në fjalë, në situatë konflikt interesi është vetë prokurorja Donika Prela,
Donika Prela ishte drejtuese e Prokurorisë për Krime të Rënda, kur në Shkurt 2019 u konfirmua në detyrë nga Komisioni i Pavarur i Kualifikimit, pavarësisht problematikave të evidentuara në kriterin e pasurisë dhe integritetit profesional.
Komisioneri Publik ankimoi pranë Kolegjit të Posaçëm të Apelimit (KPA) vendimin e konfirmimit në detyrë të Donika Prelës.
Në 2 Maj 2019, KPA caktoi trupën gjyqësore që do të shqyrtonte ankimimin kundër Donika Prelës.
Rreth 8 muaj më vonë, Këshilli i Lartë i Prokurorisë e cakton Donika Prelën si prokurore në Prokurorinë e Tiranës, pas shkrirjes së ish-Krimeve të Rënda.
Si prokurore në Tiranë, në një kohë ende të paqartë, Donika Prelës i është caktuar të hetojë shtetasit V.M dhe A.M, vëllezërit e Natasha Mulajt.
Në këto rrethana, legjislacioni në fuqi ngarkon prokuroren Prela që të zgjidhi konfliktin e interesave, duke qenë se u ngarkua të hetonte vëllezërit e kryetares së trupës gjykuese për rastin e saj, të përzgjedhur shumë kohë më parë.
Por, Donika Prela ka vijuar të mbajë në dorë procedimin penal ndaj vëllezërve të gjyqtares Mulaj, duke vepruar tërësisht në kushtet e konfliktit të interesave dhe në shkelje të ligjit që normon veprimtarinë e prokurorëve.
Në seancën e parë në KPA, prokurorja pretendoi se kishte rënë vetëm tani vonë në dijeni të faktit se të hetuarit prej saj, V.M dhe A.M. janë vëllezërit e gjyqtares Mulaj.
Gjithësesi, tashmë në shqyrtimin e konfliktit të interesave është përfshirë edhe Inspektori i Lartë i Drejtësisë.
“Boldnews.al”, në përfundim të seancës gjyqësore në KPA, në fundjavën e kaluar, iu drejtua Kryeinspektorit të Drejtësisë, për të pyetur nëse rrethanat e parashtruara nga Donika Prela, si edhe dokumentat e tjerë publikë, a janë të mjaftueshëm për të kryer një procedurë verifikimi disiplinor ndaj prokurores.
Kryeinspektori i Drejtësisë, Artur Metani, konfirmoi se të dhënat e përcjella nga redaksia e “Boldnews.al” dhe të raportuara edhe më herët publikisht, janë të mjaftueshme për të nisur procedurën e verifikimit administrativ.
