Vrau kryeadministratorin e fshatit Kotë, 18 vite burg autorit

Fshati Kotë u trondit në nëntor të 2018-s kur mbeti i vrarë Fatmir Hodo, 64 vjeç, kryetar i njësisë administrative, pasi u qëllua me çifte nga 44-vjeçari Admir Delaj pas një sherri.

Delaj është njohur sot me vendimin e gjykatës. Gjykata e Vlorës ka dënuar me 18 vjet burg autorin. Gjyqtare e çështjes ishte Herila Çela dhe prokuror Arjan Xhaferllari.

Burime bëjnë me dije se sherri mes Hodos dhe autorit të vrasjes Admir Delaj ka nisur fillimisht për arsye politike, dhe më pas ka degjeneruar, duke i përmendur njëri-tjetrit dhe familjarët.

Mes të dyve ka pasur dhe debate të hershme për një gardh, disa vite para ngjarjes së rëndë kanë pasur nje debat për shtyrjen e një gardhi në tokat bujqësore. Konflikt që është zgjidhur asokohe. Teksa ishin duke konsumuar një kafe në ambientet e lokalit, mësohet se autori i ka kërkuar llogari viktimës se pse ky i fundit nuk ka këmbëngulur për ta bërë Gumenicën pjesë të 100 fshatrave.

LEXO EDHE  U gjetën të pajetë në resort, tërhiqen nga morgu trupat e turistëve rusë

Gjatë konfliktit për tema politike debati ka gjeneruar në ofendime për familjet e secilit. Burime bëjnë me dije se viktima i ka përmendur divorcin autorit, ndërsa ky i fundit ka shkuar në makinën që e kishte pak metra larg lokalit, ka marrë armën dhe ka qëlluar nga një distancë e afërt viktimën.

Gjatë dëshmisë së dhënë për efektivët e policisë autori ka pranuar se e ka kryer krimin në gjaknxehtësi. “Isha i pirë”, mësohet të ketë thënë ai para policisë. “Kemi bërë fjalë dhe unë u nxeha”. Sa i përket mbajtjes së armës Delaj është shprehur: “E mbaja për gjah, do ikja për gjah ndaj e kisha në makinë”.