Vllaznia luan nesër në kryeqytet kundër skuadrës së Partizanit. Shkodranët po kalojnë një formë mjaft të mirë dhe në ndeshjen e fundit ata dolën triumfus përballë Kukësit.
Objektivi i klubit në këtë fundsezoni është evitimi i vendit të tetë për të mos rrezikuar me një “playoff” të mundshëm.
Nesër në orën 17:45, fitorja është alternativa e vetme për Vllazninë dhe Hysen Dedja, trajneri i skuadrës, duke folur për Abc Neës, ndihet optimist dhe beson se djemtë e tij do të arrijnë te tre pikët përballë Partizanit.
Gjëndja e skuadrës- “Për një trajner është shumë gjë pozitive kur ke grupin e gatshëm dhe kur shumë mundësi e alternativa. Gurishta ishte një mungesë e rëndësishme në takimin me Kukësin dhe tashmë është një rikthim me vlerë. Por, mungon Malota, i cili është një pikë shumë e fortë e ekipit tonë, po ashtu do të na mungojë edhe Hygor që nuk është paraqitur. Edhe Ramadani e Bardulla vijojnë të kenë probleme. Rikthimi i rëndësishëm për ne është vetëm ai i Gurishtës”.
Kundërshtari– “Kam folur me ekipin për takimin e radhës ndaj Partizanit, një takim shumë i rëndësishëm për ne. Unë kam po të njëjtin besim që kisha para takimit me Kukësin. Skuadra më përgjigjet në të gjithë aspektet. Këtë dëshirë dhe atë lojë që paraqitëm ndaj Kukësit, do ta paraqesim edhe ndaj Partizanit”.
“Unë e kam ndjekur skuadrën e Partizanit. Mund të them se ka një skuadër shumë të mirë, pavarësisht vendit në të cilin ndodhet ajo aktualisht. Ne do ta vlerësojmë në maksimum këtë skuadër. Dua të ritheksoj se motivet tona jam më të mëdha se të çdo skuadre tjetër. Mund të them se motivi ynë është edhe më i madh sesa edhe i Tiranës që u shpall kampion. Kam besimin e plotë se nuk do të jemi në “play-out. Ekipi më ka dhënë besim për këtë gjë”.
