Dy ditë më parë ministrja e Shëndetësisë, Ogerta Manastirliu, deklaroi ndalimin e muzikës pas orës 20:00, në kuadrin e masave kundër Covid-19.
Sipas Manastirliut, muzika ndalohej për shkak se ajo mbledh njerëz dhe grumbullimet ndalohen për shkak se mund të përhapet koronavirusi.
Vendimi nisi të zbatohej me gjoba ndaj subjekteve, ndërsa artistë dhe pronarë lokalesh në Tiranë protestuan para Kryeministrisë.
Policia ndërhyri dhunshëm, madje duke proceduar penalisht disa nga pjesëmarrësit në protestë.
Por ndërsa baret dhe restorantet gjobiten me miliona lekë, madje iu hiqet edhe licensa për ushtrim aktiviteti nëse lejojnë muzikën pas orës 20:00, Kryebashkiaku Erion Veliaj ka sfiduar jo vetëm Ogertën dhe Komitetin Teknik, pas të cilit fshihen vendimet që shoqërohen me humor në rrjetet sociale, por edhe Kryeministrin Edi Rama.
Ky i fundit ka mbështetur ndalimin e muzikës pas orës 20:00, por duket se nuk ka fuqi të bindë Veliajn për t´a zbatuar këtë vendim.
Kryebashkiaku i Tiranës edhe më parë, në kohën e karantinës totale, ka sfiduar vendimet e Qeverisë, madje në rrjet kanë qarkulluar foto edhe duke luajtur futboll me stafin e bashkisë.
Nuk dihet nëse ligji vepron në rastet kur ai shkelet nga Kryebashkiaku i Tiranës, por pas vendimit të tij për të mos njohur nje vendim mbi ndalimin e muzikës, të gjithë mund të reagojnë në një mënyrë të tillë.
