Pesë persona janë proceduar lidhur me protestën e mesditës së djeshme para kryeministrisë, ku policia ndërhyri me forcë duke shoqëruar disa prej pjesëmarrësve.
“Specialistët për Hetimin e Krimit në Komisariatin e Policisë Nr. 2, në përfundim të veprimeve të kryera në lidhje me protestën e paligjshme të zhvilluar mesditën e djeshme në bulevardin ‘Dëshmorët e Kombit’, proceduan penalisht në gjendje të lirë 5 shtetas”, njoftoi policia.
Ata akuzohen për veprat penale: “Organizimi dhe pjesëmarrja në grumbullime e manifestime të paligjshme”, “Pengimi i qarkullimit të mjeteve të transportit”, “Kundërshtim i punonjësit të Policisë së rendit publik” dhe “Mosbindja ndaj urdhrit të punonjësit të Policisë së rendit publik”.
“Personat e proceduar kanë protestuar në mënyrë të paligjshme, pa lejen e organeve kompetetente, duke penguar qarkullimin e mjeteve dhe duke i janë bindur urdhrit të punonjësve të policisë për t’u shpërndarë”, njofton më tej policia e Tiranës.
Edhe para dy ditëve u zhvillua një protestë gjatë pasdites për të njëjtën kauzë. Edhe në atë rast, policia njoftoi procedimin e disa protestuesve.
