Erion Dasho, ekspert i shëndetit publik, tha se karantina e aplikuar në Shqipëri ishte e tejzgjatur dhe nuk pati një strategji të hapjes.
“Nuk kemi një menaxhim të pandemisë, nuk ka një komunikim me publikun, por fajësohen qytetarët, ndërkohë që kur mungon strategjia, përgjegjësia bie mbi Qeverinë.
Pas hapjes, vatrat e para u shfaqën në spitale, më pas në biznese, institucione shtetërore dhe familje. Pse ndodhi kjo? Sepse nuk patëm një strategji hapjeje”, tha Dasho në emisionin Tempora.
Sipas tij, situata është e vështirë, dhe mendoj se karantina po rikthehet në mënyrë graduale.
“Ne nuk testojmë, kemi një rritje eksponenciale të rasteve me Covid-19. Ne duhet të kemi deri në 500 raste të reja në ditë. Mesatarja ditore e vdekjeve në muajin korrik është 2.6, që do të thotë se kemi 500 raste në ditë dhe po shkojmë drejt tejmbushjes së sistemit shëndetësor”, tha Dasho.
Sipas tij, qeveria ka vetëm një mjet, masat ndëshkuese, po kjo është e dëmshme, qoftë për sistemin shëndetësor, ashtu edhe për ekonominë.
