Importuesit po blejnë më lirë nga jashtë si pasojë e zhvlerësimit të euros, por gjithsesi po i shesin produktet më shtrenjtë në tregjet e vendit. E konfirmojnë edhe shifrat nga Instituti i Statistikave. Nëse harkun e muajve janar-prill të 2024-s një kilogram drithë importohej mesatarisht për 46.4 lekë, tani po importohet për 37.6 lekë. Pra vlera e drithit të importuar ka rënë me 19 për qind, por kjo nuk është reflektuar te çmimi i bukës apo nënprodukteve të tjera.
“Duket sikur importuesit janë fokusuar te fitimi i momentit pa reflektuar luhatjet e kursit të këmbimit. Marzhet e tyre të fitimit janë rritur, ndërsa nuk përjashtohen edhe rastet e spekulimit nga ana e tyre”, thotë për A2 CNN Klodian Muço, pedagog ekonomie.
E njëjta sjellje vihet re edhe te importuesit e frutave dhe perimeve. Nëse një vit më parë, një kilogram zarzavate blihej nga jashtë për mesatarisht 72.5 lekë, këtë vit po kushton 64 lekë. Pra ndonëse çmimi në import ka rënë me gati 12 për qind, frutat dhe perimet në tregjet e vendit po kushtojnë më shumë .
“Do të duhet ndërhyrje nga qeveria. Edhe pse Bordi i Karburanteve nuk është shembulli më i mirë për t’u marrë, gjithsesi shërbeu si mjet kontrolli për të frenuar disi abuzimet. Kështu duhet vepruar edhe me importuesit”, thotë Muço.
Mishi dhe nënproduktet e tij, bashkë me bulmetin e vezët janë të tjera ushqime që janë shtrenjtuar këtë vit, ndonëse çmimet e tyre në import kanë rënë. Megjithatë në dyqanet e lagjeve, supermarkete e tregje, produktet që bihen jashtë tashmë me kosto më të ulët, gjithsesi po blihen më shtrenjtë nga shqiptarët./ A2
