Kryeministri Edi Rama u shpreh i kënaqur lidhur me marrëveshjen e 5 qershorit, e cila do të votohet në seancën e 23 korrikut, por edhe për miratimin e ndryshimeve Kushtetuese përsa i takon listave të hapura.
Rama tha se duhet një orë e më parë që të mblidhet Këshilli Politik për të vijuar diskutimet e hapura dje në mbledhjen e zhvilluar.
“Opozita jashtëparlamentare kërkonte të dinte datën e saktë se kur do të miratohej marrëveshja e 5 qershorit dhe tashmë ne e kemi një datë, 23 korrik.
Dhe tjetra është votimi më 30 korrik i ndryshimeve Kushtetuese, pra hapjen e listave”, tha Rama.
Kryeministri tha se ka besim që në seancën e 23 korrikut do të sigurohen 84 votat për miratimin e marrëveshjes së 5 qershorit.
“Jam i bindur që do e kalojmë ligjin, edhe pse kishte debate të forta me Myslym Murrizin që nuk e njihte marrëveshjen e 5 qershorit.
Ai shprehu bindjen se në 30 korrik do të miratohet marrëveshja me opozitën parlamentare, pavarësisht se çfarë qëndrimi do të mbajë opozita jashtëparlamentare.
“Nesër ne do të jemi në Këshillin Politik dhe do të diskutojmë përsa na takon. Si marrëveshja e sotme ashtu edhe ajo e 5 qershorit duhet të kthehen në materie në ligj dhe ndryshime Kushtetuese”, tha Rama. Sipas tij, nuk duhet humbur më kohë, pasi në marrëveshjen e 5 qershorit ka disa elementë që duhen implementuar si teknologjia në zgjedhje dhe KQZ e re.
Rama tha se çështja e koalicioneve do të sanksionohet në Kodin Zgjedhor, sikundër edhe pragu elektoral dhe hapja e listave.
“Kam një apel për Lulzim Bashën pastaj për të tjerët, mos bëni gabimet e së shkuarës duke refuzuar tryezat politike. Nuk është e thënë të arrijmë dakordësinë 100 %, por duhet të gjejmë një konsensus”, tha ai.
