Epidemiologu i njohur Ilir Alimehmeti mbrëmjen e sotme ka bërë një denoncim të fortë lidhur me faktin se mjekët apo personeli shëndetësor në qendrat dhe spitalet shtetërore nuk tamponohen.
Alimehmeti tha se duke mos u tamponuar lidhur me Covid-19 ato mund të bëhen përhapës të koronavirusit pa qenë në dijeni.
“Kemi shumë mjekë që janë në gjendje shumë të mirë, që mund të mos shfaqin simptoma dhe mund të jenë bartës të koronavirusit.
Kini parasysh se QSUT është një qendër kombëtare spitalore, e cila mund të kthehet në shpërndarëse të koronavirusit në të gjithë Shqipërinë.
Duhet të ketë një protokoll për këtë, duhet që personeli shëndetësor ti nënshtrohet testimeve në mënyrë që ky personel të mos kthehet në përhapës të Covid-19”, tha Alimehmeti në emisionin 360gradë.
Sipas tij, kjo gjë ka vlerë të bëhet edhe sot, në mënyrë që një pacient që shkon në një spital si QSUT, apo në një tjetër spital shtetëror të mos infektohet atje.
Lidhur me shtimin e rasteve, Alimehmeti tha se ato shpjegohen me hapjen, por edhe shtimin e testimeve.
“Janë shtuar testimet krahasuar me prill-majin dhe janë shtuar rastet. Veç kësaj kemi edhe hapjen që ndikon në shtimin e rasteve”, tha Alimehmeti.
