Avokati Ledio Braho është shprehur se mazhoranca ka qëllim kapjen politike të Gjykatës Kushtetuese. Qëllimi, sipas tij, është për të mos rrëzuar ligjet antikushtetuese të miratuara nga mazhoranca.
Në një intervistë televizive, Braho tha se nëpërmjet kapjes së Gjykatës Kushtetuese saj “arrihet që të gjithë palishmëritë, ligjet që janë në kundërshtim me Kushtetutën që janë miratuar gjatë kësaj mazhorancës do të kenë probleme me Gjykatën Kushtetuese”.
“Nëse ka një Gjykatë Kushtetuese që shkon sipas interesave të mazhorancës patjetër që të gjithë këto ligje do qëndrojnë në fuqi në Gjykatën Kushtetuese. Debati sot po bëhet a do kemi një Gjykatë Kushtetuese të kapur nga mazhoranca apo nuk do kemi një gjykatë kushtetuese funksionale. Ngado që të shkojmë situata është problematike për sa i përket kushtetutshmërisë dhe demokracisë në Shqipëri”, tha ai.
Kjo vjen, sipas ekspertit ligjor, si pasojë e mënyrës si u konceptua dhe zbatua reforma në drejtësi.
“Pra një boshatisje e tillë e Gjykatës Kushtetuese, e menjëhershme, dhe emërime të tilla që duhet të bëhen brenda një mazhorance, brenda një qeverisje, aq më tepër kur flasim për një mazhorancë që s’ka më as opozitë parlamentare, por një patericë në vend të opozitës parlamentare, patjetër që sjell një situatë të tillë që dëmton rëndë demokracinë në vend”, tha Braho.
