Nënkryetari i LSI-së, Petrit Vasili, deklaroi sot se Kryeministri Edi Rama ka frikë nga zgjedhjet dhe kjo është arsyeja sipas tij, që ai po shqyen Kushtetutën.
“Të gjithë ju keni ndjekur dje me përçmim të gjithë farsën për gjoja ndryshimet kushtetuese, që sipas Edi Ramës i duhen atij sepse ai ka një frikë të jashtëzakonshme nga zgjedhjet dhe duhet të shqyejë Kushtetutën.
Keni dëgjuar edhe fjalët e Edi Ramës se si ai dje kërkonte që në mënyrë të njëanshme, vetëm e vetëm ai të ndryshonte Kushtetutën e vendit. Hajde të gjithë së bashku të nderuar qytetarë, t’u vëmë në dispozicion së çfarë thoshte po i njëjti Edi Rama, kundër këtij Edi Ramës së sotëm dikur kur ishte në opozitë në korrikun e 2012 në lidhje me ndryshimet kushtetuese”, tha Vasili.
Në vijim ai ngriti pyetjen se ç‘është ky tmerr i madh që e bën Edi Ramën sot ti harrojë parimet me të cilat u është drejtuar me kaq pathos shqiptarëve?
“Po cila është ajo frikë kaq e madhe që e bën Edi Ramën t’i shkelë këto parime, t’i shkelë ditën për diell, por cila është kjo frikë kaq e fortë e tmerrshme që e ven për fundi Edi Ramën që e detyron që pikërisht ato që ka thënë atje me zë dhe me figurë me një aktrim shembullor pse jo me shumë pathos dhe me shumë idealizëm.
Ku vajtën këto ideale? Cila frikë i rrënoi, i vuri për fundi, i shkeli? Cili interesi i kapi pikërisht për xhakete Edi Ramën dhe të tjerët dhe i bëri të harrojnë këto patetizma kaq të mëdha idealistike lidhur me mosndryshimin e Kushtetutës.
Përgjigja është vetëm një, frika e tmerrshme e humbjes së pushtetit dhe humbja e sigurt e pushtetit e detyron Edi Ramën t’i kundërvihet atij Edi Ramës së 8 viteve më parë dhe të thotë saktësisht të kundërtën sot”, tha Vasili.
