Kategoria Superiore/ Mbyllet java e 33-të, ja rezultatet e ditës së sotme

Janë luajtur sot tre takimet e fundit për javën e 33-të në Kategorinë Superiore.

Kukësi ka mundur 3-0 Teutën dhe ka shkuar katër pikë larg Tiranës kryesuese kur kanë mbetur edhe tri javë nga fundi i Kategorisë Superiore.

Një fitore bindëse për verilindorët, e siguruar në 35 minutat e para. Limaj (5′) dhe Cooper (12′, 35′) kanë shënuar për vendasit. Fitorja mund të kishte qenë më e thellë për Kukësin nëse penalltia e goditur nga Musollinë minutën e 67-të nuk do të ishte pritur nga Frashëri.

Fitore edhe për Skënderbeun që ka mposhtur me rezultatin 2-1 Vllazninë falë një goli të shënuar në fundin e takimit nga shkodrani 22-vjeçar Pusi. Grii ka kaluar në avantazh korçarët në minutën e 10-të, ndërsa Krymi ka barazuar përkohësisht për shkodranët në të 73-ën.

LEXO EDHE  Sherr te Tirana, çfarë ndodhi mes Ngoo dhe Karabecit

Ndërkohë më herët në orën 17:45 u luajt takimi mes Laçit dhe Luftëtarit. Vendasit mposhtën me rezultatin 3-1 miqtë në Kurbin. Takimi u hap që në minutën e 2′ me anë të autogolit të Kukajt. Mbrojtësi i Luftëtari dërgoi topin në portën e tij për 1-0.

Pjesa e parë u mbyll me rezultatin 2-0 me Redon Xhixhen që gjeti rrugën e rrjetës në fund të pjesës së parë.

Kurbinasit patën fat dhe në fillimin e pjesë së dytë. Rezultati shkoi 3-0 sërish me autogol, pasi Lala dërgoi topin në rrjetë në minutën e 50′. Miqtë reaguan në minutën e 85′ me Memetllarin, por që goli nga penalltia vlen për statistikë për të mbyllur sfidën në 3-1. Laçi merr vendin e tretë me 55 pikë në pritje të ndeshjes së Teutës.