Kryeministri Rama dhe PS mbështesin hapjen e listave të kandidatëve për deputetë, propozim i një grupi të opozitës në parlament.
“Ne kemi vendosur që të mbështesim si PS hapjen e listave dhe t´i japim mundësi çdo zgjedhësi të zgjedhë subjektin politik dhe të shpreh preferencën e tij për deputetin e përfshirë në listën e subjektit”, tha Rama në një konferencë për mediat.
“Është një vendim që reflekton bindjen se hapja e listave përkon me dëshirën e një mase shumë të madhe qytetarësh shqiptarë që shkon përtej një shumice ose pakice qeverisëse”, shtoi ai.
Rama theksoi se “sistemi nuk preket” dhe as “zonat zgjedhore”.
Kryeministri deklaroi se nuk mund të ketë më koalicione parazgjedhore, nëse hapen listat e kandidatëve për deputetë.
Rama mori si shembull vendet europiane të cilat nuk lejojnë koalicionet dhe tha se vetëm në Shqipëri ka koalicione ku vota e një partia numërohet dhe i jep deputet një partie tjetër:
“Listat e hapura e bëjnë të pamundur mbajtjen e koalicioneve. Do të bënin të pamundur votimin, me fletë kilometrike. Kemi Holandën që ndalon çdo formë koalicioni. Kemi shumë vende që subjektet bashkohen në një listë. Nuk kemi asnjë vend, përveç vetes që një mullar i madh me parti ku shumicën e tyre nuk e ka dëgjuar askush, futen në një tren të madh, përfitojnë nga buxheti i shtetit dhe bëjnë që qytetari të votojë për njërin dhe votën ta marri tjetri”.
