Aktualisht Barcelona ndodhet katër pikë pas kryesuesve të Real Madrid, ndërsa kanë mbetur vetëm katër ndeshje deri në përfundimin e sezonit në La Liga. Por kjo situatë nuk e ndalon Quique Setien që të tregohet optimist për shanset e skuadrës së tij për tu shpallur kampion.
Në prag të sfidës së Barcelonës kundër Espanyol në Camp Nou, ndeshje e cila luhet të mërkurën mbrëma, Setien ka dalë në konferencë për shtyp teksa ka deklaruar se klubi që ai drejton ka akoma mundësi për të fituar La Ligën.
“Sigurisht që mund ta fitojmë La Ligën. Historia dhe matematika e dëshmojnë këtë. Nuk do të jetë e lehtë por shpresa nuk duhet humbur asnjëherë. Duhet të mendojmë vetëm për skuadrën tonë dhe të fitojmë çdo ndeshje.” – ka thënë tekniku 61-vjeçar.
